Մոտիվացիա.Հայ հայտնիների դպրոցական բարդույթները

Wnews.am-ը գրում է.

Թվում է, թե ինչ բարդույթներ պետք է ունենա գեղեցկուհի Մայա Պողոսյանը, ով միայն իր արտաքինով կարող է բարդույթներ առաջացնել հազարավոր աղջիկների մոտ, ինչ բարդույթներ պետք է ունենա հրաշալի դերասանուհի Տարթև Հովակիմյանը, հմայիչ Շուշան Երիցյանը, նուրբ-նրբագույն Լուսինե Բադալյանը և երկու երեխաների երջանիկ մայր Աննա Գևորգյանը:  Բայց, բոլորն էլ ունենում են իրենց խնդիրները, հատկապես՝ թինեյջերական տարիքում. ոմանք ժամանակի ընթացքում ազատվում են այդ խնդիրներից, իսկ ոմանք բարդույթների բեռը կրում են ողջ կյանքի ընթացքում:

Wnews.am-ը հայ հայտնիների օգնությամբ և նրանց օրինակով պատրաստել է մոտիվացնող նյութ, թե ինչպես ազատվել բարդույթներից և հասնել  նպատակներին:  Մենք վստահ ենք, որ դուք կարող եք:

Մայա Պողոսյան.  EL Style ամսագրի գլխավոր խմբագիր

 Փոքր տարիքում ամաչկոտ էի, հավաքույթների ժամանակ չէի սիրում ուշադրության կենտրոնում լինել, ինձ համոզում էին, որ վեր կենայի պարեի։ Դպրոցական հասակում հասկացա, որ ես ինքս չեմ ուզում այդպիսին լինել: Նկարահանումների առաջարկներ էի ստանում, բայց հիմնականում մերժում էի։ Հետո աստիճանաբար սկսեցի մասնակցել դրանց եւ ինքնուրույն հաղթահարեցի այդ կաշկանդվածությունը։  Այժմ աշխատանքի բերումով հաճախ եմ մասնակցում տարբեր միջոցառումների, նկարահանումների եւ միշտ ուշադրության կենտրոնում եմ լինում։ Նույնիսկ հավատս չի գալիս, որ մանուկ հասակում ինքս իմ հակապատկերն էի: Սովորաբար, երեխաները մանուկ հասակում կաշկանդվում են իրենց բարձր հասակից։ Ես մեր դասարանում ամենաբարձրահասակն էի, բայց դրանից երբեք չեմ բարդույթավորվել։

 Լուսինե Բադալյան-հաղորդավարուհի. Բարձր դասարաններում սկսեցի մի քիչ լցվել , չէի ասի գիրանալ , բայց , այսպես ասած՝ թմբլիկ էի ու շատ էի նեղվում դրանից, նաև դուր չէր գալիս մազերիս գույնը , որոնք ինձ «անգույն» էին թվում : Միշտ ասում էի ՝ բավական չէ գեր եմ, մի հատ էլ՝ անգույն : Նիհարելը ոչ մի կերպ չէր ստացվում , բայց որոշել էի՝ հենց դպրոցն ավարտեմ  փոխելու եմ մազերիս գույնը ու այդպես էլ արեցի , ինչի համար, իհարկե, ավելի հասուն տարիքում շատ զղջացի : Քանի որ ես «չունեի» իմ երազած արտաքինը ,  իմ բոլոր ուժերը կենտրոնացնում էի սովորելու վրա : Տարիների ընթացքում ես հասա իմ երազած կամ պատկերացրած արտաքին տեսքին. նիհարեցի /ինքնստինքյան/, մազերիս գույնը փոխեցի , իսկ այն ինտելեկտուալ պաշարը, որ կուտակել էի դպրոցական տարիներին , ամենամեծ և ամենակարևոր բանն էր, որ մինչ օրս ինձ օգնում է ապրել և աշխատել :

 Շուշան Երիցյան-դերասանուհի, հաղորդավարուհի. Անցումնային շրջանում բոլորն էլ ունենում են բարդույթներ և չնայած դպրոցում շատ վառ ու ակտիվ կերպար եմ եղել, ես նույնպես ունեցել եմ իմ բարդույթները:  Մեր օրերում, չգիտես ինչու, ծնողներն իրենց երեխաների համար ընտրում են  ոչ հայկական անուններ և երբ տեսնում ես այլ ազգերից վերցրած «նորաձև» անունները, քո անունից մի տեսակ սկսում ես բարդույթավորվել:  Միայն հետո, երբ մեծանում ես, շնորհակալ ես լինում, որ հենց այդ անուն ազգանունն ունես , դա ամենահամապատասախանն է քեզ ու որ ինքդ էլ հայկական անուններ կընտրես քո երեխաների համար:   

Տաթև Հովակիմյան-դերասանուհի. Միշտ եղել եմ դպրոցի ու դասարանի ակտիվ աղջիկներից։ Կազմակերպել ու մասնակցել եմ տարբեր միջոցառումների, վարել եմ դպրոցի վերջին զանգը: Միշտ եղել եմ ուշադրության կենտրոնում: Դպրոցում, որպես աշակերտուհի, երբեք որևէ բարդույթ չեմ ունեցել, այսինքն  մանկական բարդույթներ։ Ունեցել եմ իդեալական դպրոցական կյանք։ Այ թե ինչքան հետաքրքիր բաներ են  եղել կյանքում, ով ինձ չի սիրել, ով է փորձել կոտրել, ինչ բարդույթներ ունեմ, թույլ կողմեր  դրանք իմն են ու այո, փորձում եմ միշտ հաղթահարել: 

Աննա Գևորգյան-հաղորդավարուհի. Երազանքների իրագործմանը խանգարում է ծուլությունը:  Դեռ մանկուց ծնողները պետք է երեխայի մեջ սերմանեն ինքնավստահություն և աշխատասիրություն: Այս դեպքում  նրա առաջ հետագայում ոչ մի փակ դուռ չի լինի: