Արայիկ Հարությունյանը Մարտակերտի շրջանի բնակիչների հետ քննարկել է համայնքային խնդիրները

Արցախի Հանրապետության վարչապետ Արայիկ Հարությունյանը փետրվարի 25-ին այցելել է Մարտակերտի շրջան և մասնակցել Մոխրաթաղի և Մարտակերտի համայնքապետների՝ 2015թ. գործունեության հաշվետվությունների ներկայացմանը: Ինչպես տեղեկացրին ԱՀ կառավարության աշխատակազմի տեղեկատվության և հասարակայնության հետ կապերի բաժնից, Մոխրաթաղի համայնքի ղեկավար Նորայր Ամիրյանը, ներկայացնելով մեկամյա գործունեության արդյունքները, նշել է նաև բնակչությանը հուզող հիմնական խնդիրները, որոնք վերաբերում են ինչպես գյուղի ենթակառուցվաքներին, այնպես էլ սեփական եկամուտների ավելացման հնարավորություններին:

Գործադիր իշխանության ղեկավարը շեշտադրել է, որ գյուղի ենթակառուցվածքների խնդիրները կառավարության ուշադրության կենտրոնում են և առաջիկա տարիներին դրանք հիմնովին լուծում կստանան: Բնակիչների սեփական եկամուտների ավելացման համար վարչապետն առաջարկել է հիմնել կոոպերատիվ տնտեսություն և, հաշվի առնելով համայնքի ունեցած բարենպաստ պայմանները, զբաղվել այգեգործությամբ: Այս առումով Արայիկ Հարությունյանը նշել է, որ Գյուղնախարարության միջոցով կառավարությունն իրականացնում է տնկիների պահանջվող տեսակների գնման և այգեգործությամբ զբաղվող քաղաքա ցիներին անվճար տրամադրման ծրագիր: «Մոխրաթաղում, կոլեկտիվ տնտեսության շրջանակներում, այգեգործության զարգացման համար կառավարությունը ցուցաբերելու է մեծ աջակցություն, որպեսզի այն իրականացվի ժամանակակից պահանջներին համապատասխան: Այսօր  առանց նորարարական մեթոդների անհնար է պատկերացնել մեծածավալ և մրցունակ բերքի ապահովումը»,- նշել է վարչապետը և հավելել, որ այգեգործությունն Արցախի գյուղատնտեսության հեռանկարային ճյուղերից է:

Մարտակերտի քաղաքապետ Միշա Գյուրջյանը անցած տարվա ձեռքբերումներից առանձնացրել է հատկապես գրանցված 90 ծնունդները: Քաղաքապետի խոսքով՝ քաղաքաշինության ոլորտում 2015թ.-ին Մարտակերտում պետական և բարեգործական ծրագրերի շնորհիվ իրականացվել են մեծածավալ աշխատանքներ, սակայն հրատապ են մնում դպրոցական շենքի, մարզադահլիճի, ինչպես նաև քաղաքում դեռևս առկա փլատակների խնդիրները:

Վարչապետը նշել է, որ դպրոցական շենքի խնդիրը շատ շուտով լուծում կստանա, քանի որ դրա կառուցումը նախատեսված է կառավարության ընթացիկ տարվա կապիտալ շինարարության ծրագրում: Արայիկ Հարությունյանի խոսքով, մոտ ապագայում լուծվելու է նաև մարզադահլիճի խնդիրը, սակայն փլատակների հարցը մտահոգիչ է, քանի որ այն շրջկենտրոնի համար քաղաքաշինական լուրջ խնդիրներ է առաջացնում: «Մենք հասկանում ենք, որ փլատակների հարցը միայն քաղաքաշինական և սանիտարական տիրույթներում չէ, այն նաև բարոյական կողմ ունի: Ի վերջո, դրանք պատկանում են մեր այն հայրենակիցներին, ովքեր հարկադրաբար թողել են հայրենիքը, սակայն պետք է կամք դրսևորենք և լուծման հնարավոր տարբերակներ գտնենք: Մենք նրանց միշտ սպասում ենք, բայց չենք կարող տասնամյակներով Մարտակերտն ավերված թողնել»,- նշել է վարչապետը և հանձնարարել համապատասխան մարմիններին արտերկրում բնակվող, սակայն անցած տասնամյակներում երբևէ հայրենիք չայցելած մարտակերտցիներին որոշ ժամանակ ևս տրամադրել՝ վերադառնալու և իրենց նախկին տները վերականգնելու համար: Հակառակ դեպքում, դրանք կսեփականաշնորհվեն համայնքի կողմից՝ նոր բնակելի տների կառուցման և համ այնքային այլ խնդիրներ լուծելու նպատակով: Արայիկ Հարությունյանի հավաստմամբ՝ բոլոր նրանք, ովքեր այս ընթացքում ևս չեն արձագանքի, հետագայում հայրենադարձության պարագայում կառավարության կողմից պետական համապատասխան աջակցություն կստանան՝ նոր բնակարանների կառուցման և հայրենիքում ապրելու համար:

Հանդիպումների ընթացքում Արայիկ Հարությունյանը պատասխանել է նաև բնակիչներին հուզող հարցերին, նրանց հետ մտքեր փոխանակել համայնքային տարբեր խնդիրների շուրջ: