Սերը բոլոր տարիքներում էլ կարևոր է ու ընտանիքի կյանքը երկարացնում է. Դերասան ամուսինները նշում են ամուսնության 10-ամյակը

ԼԱՅՖ 26 Փետրվար, 2016 22:54

Aysor.am-ը գրում է.

Երբ ընտանիք են կազմում 20-22 տարեկան երիտասարդները, ռիսկային գործոնը մեծ է. այն կամ շատ ամուր կլինի, կամ… Նարեկ Հայկազյան-Ծովինար Մարտիրոսյան ամուսնական զույգն այսօր նշում է ամուսնության 10-ամյակը: Aysor.am-ը, շնորհավորելով նրանց ու մաղթելով ընտանեկան երկարակեցություն, հետաքրքրվեց մեկ հարկի տակ ունեցած դժվարությունների մասին:

«10 տարի առաջ այս օրը ծնվեց մեր ընտանիքը: Ամեն ինչ կյանքում մեզ դժվար է տրվել, նույնիսկ՝ մեր սերը: Շատ փորձություններ ենք հաղթահարել, նույնիսկ մեր կրտսեր որդուն, ով հիմա կողքիս խաղում ու թռչկոտում է, սպասել ենք 7 տարի: Բայց երբեք չենք ընկճվել, հենց այդ սիրո շնորհիվ հաղթահարել և հասել ենք մեր նպատակներին»,- ժպիտով վերհիշեց տան գլխավորը:

Տանտիրուհին էլ բնավորության համաձայն լրացրեց ամուսնուն. «Եվ երջանիկ, և դժվար տարիներ են եղել այս 10 տարիները: Առավոտյան ես և Նարեկը միմյանց նայեցինք ու ասացինք՝ 10 տարի՞: Այնքան հետաքրքիր ու բուռն են անցել այս տարիները, որ չենք էլ գիտակցել քանակը: Բոլոր նորաստեղծ ընտանիքների պես սկզբնական շրջանում մենք էլ շատ դժվարություններ ենք ունեցել՝ փոքրիկներ, կենցաղ, ֆինանս: Հատկապես, որ այն տարիքում ես, երբ այնքան էլ կայուն չես ու ամուր կառչած չես գետնին: Բայց եթե զույգերը զիջումների են գնում, սեփական ես-ը մի կողմ են դնում ու մտածում ընտանիքի կայունացման մասին՝ ամեն ինչ լավ է լինում: Մեր ընտանիքի բեռը միշտ Նարեկի ուսերին է եղել: Նա շատ համբերատար, զիջող, ազնիվ ու արդար անձնավորություն է»:

Ընտանիք կազմելուց տարիներ անց մարդիկ երբեմն զղջման պահեր են ունենում՝ մտածելով, որ դեռ կարող էին ազատությունը վայելել, որ դեռ պետք էր կայանալ ու հասունանալ: «Ես մեկ վայրկյան անգամ չեմ կասկածել, որ կարող է սխալ որոշում ընդունած լինեմ: Ընդհանրապես, շատ ճիշտ բան է, երբ շուտ ես կենտրոնանում ու որոշում կայացնում: Միգուցե տղամարդկանց համար դժվար է երիտասարդ տարիքում ընտանեկան հոգսի տակ մտնել: Նարեկի համար էլ հեշտ չէր 22 տարեկանից տան տղամարդու կարգավիճակում հայտնվել, բայց նա կարողացավ հենց այդ տարիքից առավել պատասխանատու դառնալ: Մենք միշտ միմյանց թիկունք ենք եղել, այդ խենթ ու խելառ սերը մեր հարաբերություններում միշտ առկա է եղել»,-ընդգծեց դերասանուհին:

Ասում են, ամուսնությունից հետո կենցաղը կլանում է կանանց, բայց տղամարդիկ, միևնույն է, չեն կորցնում ռոմանտիզմի զգացումը: Մեզ հետ զրույցում թեև Ծովինարը խոստովանեց, որ ամուսնուն անակնկալ չի մատուցել ու հավանաբար չի էլ մատուցի, եթե, իհարկե, չհաշվենք երեկ երեկոյան պատրաստած համեղ ընթրիքը, բայց նկատեց, որ Նարեկն առավոտից «չկա». «Նա սիրում է անակնկալներ մատուցել օրվա վերջում ու կարծում եմ, այսօր էլ բացառություն չի լինի»: Նարեկն էլ գաղտնի խոստվանեց՝ անակնկալ անպայման լինելու է. «Իհարկե, անակնկալ պատրաստում եմ Ծովինարի համար, բայց այդ մասին հիմա ոչինչ չեմ ասի: Ճիշտն ասած՝ մտածել էինք այս օրը փոքրիկ հարսանիք կազմակերպել, բայց ինչ-ինչ պատճառներով չստացվեց: Ոչինչ, այսօր ընկերներով կհավաքվենք ու կնշենք մեր տոնը»:

Երջանիկ ամուսիններն այսօր գնահատում են այն, ինչ ունեն, իհարկե, չհրաժարվելով հետագա տարիներն առավել հետաքրքիր դարձնելու մտքից:

«Միայն մեկ բան կուզեմ. մեր սերը մինչև մեր կյանքի վերջ մեզ ուղեկցի: Դրա համար պետք է ընդամենը մեր ցանկությունն ու միմյանց սիրելու կարողությունը: Եթե նույնիսկ մի պահ ամեն ինչ միապաղաղ է դառնում, պետք է փորձենք իրար ներել, հասկանալ, կյանքը հետաքրքիր դարձնել, սերը պահել ու ամեն ինչ լավ կլինի: Ես չեմ հավատում, երբ ասում են, որ սերը սովորություն է դառնում, կամ հարաբերությունները հետագայում միայն հարգանքի են վերածվում: Դա մեր ձեռքին է, մեր ցանկությունն է: Հավատացեք՝ միայն սերն է ընտանիքին առողջ պահում»,-հավելեց Ն. Հայկազյանը:

«Հաճախ, երբ գլուխս բարձրացնում եմ դեպի երկինք, որպեսզի Տիրոջից որևէ բան խնդրեմ, առաջին բառը, որ մտքիս գալիս է՝ շնորհակալությունն է… Իհարկե, կենցաղային առումով դեռ շատ պակաս բաներ կան, բայց դա միայն ժամանակի ու ֆինանսի խնդիր է: Մաղթում եմ, որ բոլոր ընտանիքներում միմյանց սիրեն և ոչ թե իրար հետ ապրեն սովորության ուժով: Սերը բոլոր տարիքներում էլ կարևոր է ու ընտանիքի կյանքը երկարացնում է»,- եզրափակեց Ծովինար Մարտիրոսյանը:

Նելլի Մարգարյան