Ավետ Բարսեղյանը նորություն ունի

Blognews.am-ը գրում է.

BlogNews-ն օրերս ներկայացրել է հաղորդավար Ավետ Բարսեղյանի հետ անկեղծ զրույցը։ Այս անգամ Ավետի հետ խոսել ենք  գործնականի մասին։ Ավետը նորություն ունի. Հանրայինի այս եթերաշրջանում նա կներկայանա երաժշտական նոր հաղորդմամբ, որի մասին փակագծերը, սակայն, առայժմ չի բացում։ Մեր զրույցի ժամանակ Ավետը ոգևորությամբ մանրամասներ է պատմել «Գուշակիր մեղեդին» հաղորդաշարից։ Այս նախագծի մասին խոսելիս նրա աչքերն այնպես են փայլում, որ ակամայից դու էլ ես ոգևորվում։) Ակնհայտ է, որ Ավետը շատ է սիրում այս հաղորդումը։

-Ավետ, հեռուստաընկերություններում մեկնարկում է նոր եթերաշրջանը։ Ձեզ կտեսնե՞նք նոր նախագծում։

-Այո, սակայն նախագծից դեռ չեմ կարող խոսել, քանի որ դեռ ընթացիկ աշխատանքներ են տարվում։ Միայն կարող եմ նշել, որ երաժշտական նախագիծ է, իսկ «Գուշակիրը»  շարունակվելու է նոր եթերաշրջանում։

-Սկսեցիք երաժշտական նախագծերից, Ձեզ փորձեցիք տարբեր ժանրերում և վերադարձաք ժամանցայինին։ Այս պահին սա՞ է Ձեզ ամենահոգեհարազատը, թե՞ ուղղակի առաջարկներն են այս ձևաչափում։

-Հեռուստատեսությունը ժամանց է՝ ինտելեկտուալ կամ ոչ։ Իմ կյանքում շատ հետաքրքիր միջազգային նախագծեր են եղել թե՛ «Շանթ» հեռուստաընկերությունում, թե՛ «Արմենիայում», թե՛ Հանրայինում։

Այս փուլում առաջարկը եղել է այս ժանրում, և ես տարբերություն չեմ դրել, քանի որ հեռուստատեսությունն ինձ հոգեհարազատ է։ Կարծում եմ՝ դրանք տարբեր գույների են, բայց բոլորն էլ ժամանց են։ Ինձ համար ամենակարևորն այն է, որ լինես մի միջավայրում, որտեղից շատ բան ես սովորում։

-«Գուշակիր մեղեդին» շատ դրական արձագանքների արժանացավ, սակայն այս դեպքում էլ կան քննադատություններ։ Երբեմն Ձեզ մեղադրում են հայտնիների նկատմամաբ կողմնակալ վերաբերմունքի մեջ։

-Շատ ուրախ եմ, որ հանդիսատեսը սիրեց «Գուշակիրը», որովհետև այն 20 տարի եղել է ռուսական դաշտում և ունեցել է Վալդիս Պելշի դեմքը։ Սովորաբար, նման դեպքերում մերոնք ասում են՝ ռուսականն ուրիշ է։ էս դեպքում այդպես չեղավ ու հաղորդումը դարձավ շատ սիրելի, ինչը ինձ համար շատ կարևոր է։ Ես կողմնակալ չեմ, պարզապես այնքան եմ հրավառվում, որ փորձում եմ օգտակար  լինել։

-Ամեն թողարկման հաջողվածությունը կախված է նաև նրանից, թե հյուրերն իրականում ինչ փոխհարաբերություններ ունեն, որովհետև նրանց ջերմությունն ու էներգետիկան փոխանցվում է հեռուստադիտողներին։ Հյուրերի ընտրությանը մասնակցո՞ւմ եք։

-Շատ նուրբ բան եք նկատել։ Հյուրերի ընտրության հետ ես բացարձակ կապ չունեմ։ Քանի որ հայկական երգարվեստում չկա մարդ, ում ես չճանաչեմ ու դրական չվերաբերեմ, ինձ համար շատ հեշտ է յուրաքանչյուրի հետ (կան մարդիկ, օրինակ, սերիալի հերոսներից, ում նոր եմ ճանաչում)։ Կարող է ուղղակի հաղորդումից հետո ասեմ՝ վայ, ինչ լավ եռյակ էր, կամ ինչ բարդ եռյակ էր։

Ընդհանուր առմամբ՝ ծրագիրը դրական է, մարդիկ չեն հեռանում պարտության  տրամադրությամբ։

-Բոլորին հետաքրքրում է հարցը՝ Ավետը գիտի՞ այս բոլոր երգերը։)

-Իհարկե չէ։) Ինչպես «Ո՞վ է ուզում դառնալ միլիոնատեր» հաղորդման, այնպես էլ այս դեպքում կա խմբագիր։ Ես միշտ անկեղծ եմ եղել հանդիսատեսի հետ։ Բնականաբար, պիտի իմանամ ու գիտեմ բազայի մեծ մասը, բայց լիովին չեմ տիրապետում երգացանկին։ Ես ունեմ հրաշալի թիմ՝ սկսած պրոդյուսեր Ռուբեն Շահինյանից, երաժշտական խմբագրեր Քրիստ Մանարյանից ու Արման Մարգարյանից մինչև դիմահարդարն ու հատակ մաքրողը։ Բոլորը պրոֆեսիոնալ են։ Գուցե շատերին թվա, թե մաեստրո Երվանդ Երզնկյանի դերակատարությունը մեծ չէ, սակայն նա այնքան կարևոր դերակատարում ունի իր ներկայությամբ՝ հուշելու աննկատ մեխանիզմով։) Իհարկե, օբյեկտիվորեն հասկանում եմ, որ շատ կարևոր է, թե ով է վարում հաղորդումը, բայց թիմի աշխատանքն էլ շատ կարևոր է։

Զրույցը՝ Ամալյա Հովհաննիսյանի