Հայոց ցեղասպանության 100-րդ տարելիցի միջոցառումների Վրաստանի հանձնախումբն ամփոփել է աշխատանքները

Վիրահայոց թեմի «Հայարտուն» կենտրոնում փետրվարի 26-ին կայացել է Հայոց ցեղասպանության 100-րդ տարելիցի միջոցառումները համակարգող Վրաստանի հանձնախմբի 2015 թվականի գործունեության և Վիրահայոց թեմի կատարած աշխատանքների տարեկան հաշվետու ժողովը, որն իր ներկայությամբ պատվել է Վրաստանում Հայաստանի Հանրապետության արտակարգ և լիազոր դեսպան պարոն Յուրի Վարդանյանը:

Ժողովին ներկա էին հանձնախմբի անդամներն Ախալքալաքից, Նինոծմինդայից, Ախալցիխեից, Ծալկայից, Բաթումից և Թբիլիսիից, «Հայարտուն» կենտրոնի խորհրդի անդամները, Վիրահայոց թեմի հոգևոր դասը, Առաջնորդարանի պաշտոնեությունը:

Տերունական աղոթքից և Վիրահայոց թեմի առաջնորդի օրհությունից հետո ժողովը ձեռնամուխ եղավ աշխատանքին:

Ինչպես «Արմենպրես»-ին տեղեկացրին Հայ Առաքելական Ուղղափառ Սուրբ եկեղեցու վիրահայոց թեմի մամուլի և լրատվության բաժնից,  հանձնախմբի քարտուղար Գիսանե Հովսեփյանը մանրակրկիտ ներկայացրել է Վրաստանի հայաբնակ տարածաշրջաններում իրականացված 100-ից ավելի ոգեկոչման միջոցառումները.  կազմակերպվել է 10 ցուցահանդես, մշակութային 20 միջոցառում, անցկացվել է հիշատակի 8 երեկո, տեղադրվել է 12 խաչքար, Վրաստանի խորհրդարանում Հայոց Ցեղասպանությունը ճանաչելու կոչով հանդես են եկել հայազգի պատգամավորները, քույր եկեղեցիներում նահ ատակների հոգու խաղաղության համար բարձրացվել է միասնական աղոթք, կայացել են գրքերի 7 շնորհանդեսներ, պահանջատիրական 11 քայլերթ, Տիգրան Համասյանի համերգը Հավլաբարի Սուրբ Էջմիածին եկեղեցում և այլն:

Զեկուցումից հետո խոսքով հանդես են եկել ինչպես հանձնախմբի անդամները, այնպես էլ ժողովի մասնակիցները: Ելույթ ունեցողները դրական են գնահատել հանձնախմբի կատարած աշխատանքները: Հանձնախմբի նախագահ Գերաշնորհ Տեր Վազգեն եպիսկոպոս Միրզախանյանի առաջարկով որոշվել է, որ հանձնախումբն այսուհետև գործի համայնքային խորհրդակցական մարմնի կարգավիճակով: Առաջարկվել է ընդարձակել խորհրդակցական մարմնի կազմը, հավելել այն իրավաբաններով և անհրաժեշտ մասնագետներով:

Ժողովի ընթացքում ներկայացվել է նաև հանձնախմբի գործունեության ֆինանսական հաշվետվությունը:

2015 թվականին Վիրահայոց թեմի գործունեությունը համապարփակ ներկայացրել է թեմի մամուլի և լրատվության բաժնի տնօրեն Սուսաննա Խաչատրյանը:

Ներկաներն իրենց գնահատանքն են արտահայտել կատարված աշխատանքների վերաբերյալ: Առաջարկվել է առավել ուշադրություն հատկացնել Թբիլիսիում և Բաթումիում հայկական դպրոցներն աշակերտներով ապահովելու խնդրին: Ելույթ ունեցողների կողմից դիտարկվել է առաջընթաց թե՛ հոգևոր սպասավորների և թե՛ Առաջնորդարանի աշխատակազմի կողմից թեմի հոգևոր-կրոնական, կրթա-մշակութային, երիտասարդական, տեղեկատվական և քարոզչական մեկամյա գործունեության մեջ:

Ամփոփիչ խոսքով հանդես է եկել Վրաստանում ՀՀ արտակարգ և լիազոր դեսպան Յուրի Վարդանյանը: Նա արժևորել է Վրաստանի հանձնախմբի լավագույնս կազմակերպված գործունեությունը և ընդգծել Հայաստանի Հանրապետության Նախագահի կողմից Վրաստանի տարածաշրջանային հանձնախմբի շնորհակալագիրը, որը տրվել է հանձնախմբի նախագահին:

Վիրահայոց թեմի առաջնորդն իր օրհնությունը փոխանցել է թեմի հոգևոր դասին: Նա բարձր գնահատական է տվեց թեմի պաշտոնեությանը ՝ կատարած աշխատանքների համար և հորդորել առավել արդյունավետ և նպատակասլաց  ծառայել ժողովրդին՝ հոգևոր, մշակութային և կրթական ոլորտներում:

Որոշվել է հանձնախմբի հերթական նիստը անցկացնել ապրիլի սկզբին։