Արմավիրում խանդոտ կինը ցախավելով ծեծել է կեսգիշերին ամուսնու հետ զրուցող կնոջը

1in.am-ը գրում է .

Վերաքննիչ քրեական դատարանի վարույթում է Խազալ Ք.-ի գործով բերված վերաքննիչ բողոքի քննությունը:

Գործը քննվել է Արմավիրի մարզի ընդհանուր իրավասության դատարանում Արթուր Ադամյանի նախագահությամբ:

44-ամյա ամբաստանյալ կինը մեղադրվել է խանդի հողի վրա մեկ այլ կնոջ ծեծելու համար՝ ՀՀ քրեական օրենսգրքի 118 հոդվածով: Ըստ մեղադրանքի՝ 2015 թվականի հունիսի 11-ին, ժամը 20-ի սահմաններում Տավուշի մարզի բնակչուհի Երազիկը (անունը փոխված է) իր անչափահաս դստեր հետ մեկնել է Արմավիրի մարզի գյուղերից մեկը, որ պարզի, թե այնտեղ՝ գյուղացիներից մեկի՝ Թովմասի (անունը փոխված է) մոտ անասնապահությամբ զբաղվող ամուսնուց ինչու դրամական միջոցներ ինքը չի ստանում:

Տեղ հասնելով՝ Երազիկը պարզել է, որ ամուսինն արդեն երկար ժամանակ չի աշխատում Թովմասի մոտ:

Պետք ասել, որ ամբաստանյալ Խազալը հենց այս գործատուի՝ Թովմասի կինն է:

Ըստ մեղադրանքի՝ իմանալով, որ ամուսինն այդ գյուղում չէ, Երազիկը զանգել է ամուսնու նախկին գործատու Թովմասին ու գիշերելու տեղ է խնդրել, քանի որ Տավուշի մարզ վերադառնալու համար բավական ուշ էր արդեն:

Թովմասը իր նախկին անասնապահի կնոջն ու երեխային առաջարկել է գիշերել իր անասնագոմերի մոտ գտնվող պահակատանը:

Կեսգիշերին՝ ժամը 00:30-ին Երազիկն իր երեխայի հետ ճամփա է ընկել դեպի վերոհիշյալ պահակատուն՝ դրա տեղը լավ չիմանալով: Ու բարեբախտաբար նա տեսել է, որ տներից մեկի բակում կանգնած է հենց անասնագոմերի ու պահակատան տեր Թովմասը:

Երազիկը մոտեցել է Թովմասին, որ ճշտի այն պահակատան տեղը, որտեղ պիտի գիշերեր:

Հենց այդ պահին բակ է դուրս եկել Թովմասի կին Խազալը: Տեսնելով, որ ամուսինը կեսգիշերին կանգնած զրուցում է Երազիկի հետ, Խազալը զայրացել է, մոտեցել է նրանց, խանդի տեսարան է սարքել ու վիճել է Երազիկի հետ:

Վիճաբանության ընթացքում Խազալը «իրեն չի կորցրել», նա ամուսնու եղբոր տան բակից ցախավել է վերցրել ու խանդի հողի վրա սկսել է ծեծել Երազիկին՝ ցախավելով 5-6 հարված է հասցրել նրա մարմնի տարբեր մասերին, այդ թվում՝ պարանոցի շրջանին, ձեռքերին: Երազիկին պատճառվել են առողջության թեթև վնասի հատկանիշներ չպարունակող վնասվածքներ:

Նույն օրը իրեն ծեծելու վերաբերյալ Երազիկը հաղորդում է տվել ոստիկանությունում:

Գործի նախաքննության ժամանակ Խազալն իրեն մեղավոր չի ճանաչել: Նա հայտնել է, որ Թովմասի հետ ամուսնացել է 1997 թվականին:

Երեք տարի շարունակ ամուսնու մոտ որպես անասնապահ աշխատել է Երազիկի ամուսինը: Իսկ Երազիկը, ըստ Խազալի, սիրահարված է եղել… Թովմասին:

Դեպքի օրը ինքը գտնվել է ամուսնու եղբոր տանը: Ուշ ժամ էր, ինքը դրսից խոսակցության ձայներ է լսել ու դուրս է եկել: Տեսել է, որ Երազիկը երեխայի հետ իր ամուսնու մոտ կանգնած՝ զրուցում է:

Ինքը մոտեցել ու պահանջել է, որ Երազիկը հեռանա, բայց վերջինս իրեն անպատիվ բառեր է ասել:

Ինքը բռնել է Երազիկի ձեռքից ու «քաղաքավարությամբ» նրան դուրս է հրավիրել իր ամուսնու եղբոր բակից:

Դատարանում, սակայն, Խազալը իրեն մեղավոր է ճանաչել Երազիկին ծեծելու համար, խոստովանել է, որ երկու անգամ նրան հարվածել է ցախավելով: Խազալը խնդրել է իր նկատմամբ մեղմ պատիժ նշանակել:

Վկա Թովմասը ՝ Խազալի ամուսինը, հայտնել է, որ Երազիկի ամուսինը իր մոտ որպես անասնապահ աշխատել է 2013 թվականից մինչև 2015 թվականի սկիզբը:

Դեպքի օրը՝ 2015 թվականի հունիսի 11-ի առավոտյան, Երազիկը զանգել է իրեն ու պահանջել է ամուսնու աշխատած գումարները: Ինքն էլ նրան պատասխանել է, որ նրա ամուսինը երկար ժամանակ է՝ իր մոտ չի աշխատում:

Բայց Երազիկը վեր է կացել ու Տավուշի մարզից երեխայի հետ եկել է իրենց գյուղ: Տեղում համոզվել է, որ ամուսինը իր մոտ չի աշխատում և զանգահարել է իրեն՝ գիշերելու տեղ խնդրելով: Ինքն ընդառաջել է նրան ու առաջարկել է, որ գիշերեն իր անասնագոմերի պահակատանը:

Կեսգիշերին ինքը դաշտից եկել է եղբոր տուն, որտեղ գտնվում էր նաև իր կին Խազալը: Եղբոր բակում իրեն է մոտեցել Երազիկը ու… առաջարկել է գիշերն անցկացնել միասին: Ինքը մերժել է Երազիկին: Ու հենց այդ ժամանակ իրենց է մոտեցել իր կին Խազալը: Նա պահանջել է, որ Երազիկը հեռանա, այդ կապակցությամբ էլ կանայք վիճել են…

Տուժող Երազիկը հայտնել է, թե ինքը, իմանալով, որ ամուսինը վաղուց արդեն Թովմասի մոտ չի աշխատում, Թովմասից միայն գիշերելու տեղ է խնդրել: Իսկ նրան տեսնելով եղբոր բակում, մոտեցել է, որ հարցնի, թե որտեղ է գտնվում պահակատունը, ուր իր երեխայի հետ գնում էր գիշերելու: Այդ ժամանակ տանից դուրս է եկել Թովմասի կին Խազալը, բակից վերցրել է ցախավելը ու հինգ-վեց հարված է հասցրել իրեն՝ պարանոցի, այտի, ձեռքերի շրջաններին:

Երազիկը դատարանում հայտնել է, որ բողոքում է Խազալի դեմ ու խնդրել է նրա նկատմամբ խիստ պատիժ նշանակել:

Դատարանը Խազալ Ք.-ին մեղավոր է ճանաչել տուժող Երազիկին ծեծելու համար՝ ՀՀ քրեական օրենսգրքի 118 հոդվածով, և, նրա պատասխանատվությունն ու պատիժը ծանրացնող հանգամանքներ չարձանագրելով, դատապարտել է տուգանքի՝ 30 հազար դրամի չափով:

Այս դատավճռի դեմ, դժգոհ մնալով պատժի մեղմությունից, վերաքննիչ բողոք է բերել տուժող Երազիկը՝ խնդրելով «վերանայել» դատավճիռը: