Բելառուսը պատրաստ է աջակցել Հայաստանին առողջապահության ոլորտում

Բելառուսը պատրաստ է առողջապահության ոլորտում Հայաստանին աջակցություն տրամադրել: Փետրվարի 29-ին ՀՀ առողջապահության նախարար Արմեն Մուրադյանն ընդունեց Հայաստանում «Հանրային առողջության նոր մարտահրավերները» խորագրով միջազգային նախարարական համաժողովին մասնակցելու կապակցությամբ մեր երկիր ժամանած Բելառուսի առողջապահության նախարար Վասիլի Ժարկոյին և նրա գլխավորած պատվիրակությանը:

«Ուրախ եմ ձեզ ողջունել առողջապահության նախարարությունում: Ինձ համար շատ կարևոր է, որ կարող ենք քննարկել առողջապահական հարցեր: Հետխորհրդային տարածքում հենց Բելառուսի առողջապահական համակարգը կարողացել է միջազգային չափանիշներին համապատասխան նշաձողի հասնել, նվազեցնել մայրական, երեխաների մահացությունները»,- «Արմենպրես»-ի փոխանցմամբ`նշեց Արմեն Մուրադյանը:

ՀՀ առողջապահության նախարարը բելառուս գործընկերոջը ներկայացրեց ոլորտի խնդիրները, խոսեց գործող դեղարտադրող ընկերությունների մասին:

«Մեր երկրների առողջապահական համակարգը շատ ընդհանրություններ ունի, ընդհանուր դպրոց ունենք, արմատներ: Մեզ համար հեշտ է միմյանց հասկանալ: Հայաստանը վերջին 25 տարիներին բժշկության առանձին ճյուղերում աճ է արձանագրել»,-ասաց Արմեն Մուրադյանը:

Հայաստանի առողջապահության նախարարը բելառուս գործընկերոջը տեղեկացրեց, որ մեր երկրում դեղերի մասին նոր օրենք է ընդունվում, ինչպես նաև Հայաստանը վերջին տարիներին նվազեցրել է մայրական և երեխաների մահացությունը:

Նա նաև անդրադարձավ այս տարի մեր երկրում արձանագրված H1N1-ի դեպքերին` հատուկ շեշտելով, որ Հայաստանում համաճարակ չի գրանցվել, թեև նկատվել են բարդ դեպքեր, իսկ դպրոցների և մանկապարտեզների աշխատանքն է դադարեցվել 3 շաբաթով:

Բելառուսի առողջապահության նախարարը շեշտեց, որ ակնկալվում է, որ երկկողմ համագործակցությունն ավելի կխորանա:

«Ուզում եմ շեշտել, որ մեր առողջապահության նախարարությունը բաց է ձեզ համար: Եկեք, սովորեք, եթե պետք լինի` մենք էլ կգանք այստեղ»,-ընդգծեց Վասիլի Ժարկոն: Նրա խոսքով` իրենց երկրի բուհերը ևս բաց են համագործակցության համար, և ինքը գիտի, որ մեր երկրում էլ բժշկական համալսարան կա: