Նազենին, Սոֆին, Արամը, Գրիշան և այլ հայտնիներ` «Փախիր կամ ամուսնացիր» ֆիլմի պրեմիերային

ՖՈՏՈ 4 Մարտ, 2016 11:11

Blognews.am-ը գրում է.

Երեկ «Սինեմա Սթար»-ում տեղի ունեցավ «Փախիր կամ ամուսնացիր» ֆիլմի փակ դիտումը: Մինչ ֆիլմի դիտելը, ստեղծագործական կազմը պատմեց ստեղծման մասին: BlogNews.am-ն ներկա էր պրեմիերային, որի ընթացքում ֆիքսել է հետաքրքիր պահերը: Ֆիլմի ռեժիսորը Հայկ Կբեյանն է, սցենարի հեղինակը՝ Աշոտ Աբրահամյանը։ Ֆիլմի գլխավոր օպերատորն Արթուր Ուստյանն է, մոնտաժն իրականացրել է Ռազ Մարգարյանը, համապրոդյուսերն է՝ Տիգրան Համբարձումյանը։

Գլխավոր դերակատար և պրոդյուսեր Մկրտիչ Արզումանյանն նշեց, որ ֆիլմի վրա շատ երկար են աշխատել. «Սա արկածային կինոկատակերգություն է, մենք փորձել ենք ստանալ այնպիսի բան, որը պատկերացրել ենք բոլորս, կարծում եմ` ստացվել է մեզ մոտ: Ես իմ յուրաքանչյուր մարմնավորած դերերին շատ լուրջ եմ վերաբերվում: Կան նախագծեր որտեղ ավելի լավ եմ զգում իմ դերը, իսկ այս ֆիլմում իմ կերպարը ինձ շատ հարազատ էր: Իհարկե այն մի քիչ այլ էր իմ խաղացածներից, բայց փորձել եմ լիովին տեղ հասցնել»:

«Պերսոնա Գրադա» ընկերության հիմնադիր տնօրեն, պրոդյուսեր Տիգրան Համբարձումյանն էլ նշեց, որ բավականին երկար էին սպասել այս պահին. «Մարտի երեքը, վերջին մեկ տարվա ընթացքում ամենաակարևոր օրերից մեկն դարձավ ինչպես իմ, այնպես էլ մեր ստեղծագործական թիմի համար: Այսօր վերջապես այս մեկ տարվա բազմաչարչար աշխատանքը հանձնում եք հանրության դատին: Շատ ուրախ եմ, որ ես Մկոն, Աշոտը կարողացել ենք մեր շուրջը հավաքել ոլորտի լավ մասնագետներին»:

Ֆիլմի բյուջեի մասին ստեղծագործական կազմը որոշեց չխոսել, փոխարենը խոսեցին դերասանական կազմի ընտրության մասին. «Հայտարարել ենք քասթինգ, որի ընթացքում էլ ընտրվել են դերասանները: Ծանոթով խաղացել են միայն մեր երեխաները: Ալիկը` տղաս, ով մարմնավորել է իմ մանկությունը և Սաթենիկը` Տիգրանի դուստրը»,-պատմեց Մկրտիչ Արզումանյանը:

Ֆիլմի պրեմիերային դերասանական կազմից ներկա չէին Իվետա Մուկուչյանը, ով այս շրջանում շրջագայությունների մեջ է, Շողեր Գրիգորյանը և Հայկ Միրզոյանը: Խոսելով Իվետային դերակատարման մասին` Մկրտիչ Արզումանյանն նշեց. Մենք իհարկե սկզբում հաշվի ենք առել, որ Իվետան միայն երգով է զբաղվել, բայց իրար հետ շատ երկար ենք աշխատել: Կարծում եմ` արդյուքը ստացվել է և միայն դիտելուց հետո կարելի է գնահատական տալ նրա խաղին»:

«Փախիր կամ ամուսնացիր» ֆիլմի գլխավոր հերոսը տաքսու վարորդ Աղասիկն է: Նա վարում է ոչ այնքան սովորական մեքենա` «Հրթիռ» անունով: Այդ մեքենան դեռ 70-ականներին նախագծել և պատրաստել է Երևանի ավտոմոբիլային գործարանի ինժեներ-կոնստրուկտոր Արշավիր Խոջոյանի՝ Աղասիկի հոր կողմից: Այդ մեքենան բավականին սիրված է զբոսաշրջիկների կողմից և Աղասիկը հաճույքով տեղափոխում է նրանց:

Բայց ամեն ինչ փոխվում է Աղասիկի կյանքում, երբ հերթական պատվերի ժամանակ նրա մեքենան է նստում Սաթենիկը, որը փախչում է սեփական հարսանիքից: Հենց այստեղից էլ սկսվում է արկածային իրավիճակը և ռոմանտիկ խաղ Մկո-Իվետա զույգի կողմից: