Բրուցելոզ. ի՞նչ անել պանիրի հետ: Գեորգի Ավետիսյանի սյունակը

ԳԵՈՐԳԻ ԱՎԵՏԻՍՅԱՆԻ ՍՅՈՒՆԱԿԸ 10 Մարտ, 2016 21:20

Հերթական վտանգավոր հիվանդությունը, որի մասին կուզեի խոսել՝ բրուցելոզն է: Հայաստանում և նախկին ԽՍՀՄ տարածքում բրուցելոզը ամենատարածված հիվանդություններից է: Բրուցելոզով հիվանդանում են գրեթե բոլոր կաթնասունները ինչպես նաև մարդը: Հիվանդությունը արտահայտվում է հոդերի ախտահարումներով, վիժումներով, ամորձիների բորբոքումներով: Հիվանդության աղբյուր են հանդիսանում հիվանդ կենդանիները: Մարդկանց համար առավել վտանգավոր են խոշոր եղջերավորների Brucella abortus և մանր եղջերավոր կենդանիների (այծերի, ոչխարների) Brucella melitensis տիպերը:

Մարդը կարող է վարակվել հիվանդ կենդանու հետ շփվելիս, մորթի և ծննդօգնության ժամանակ, ինչպես նաև հում կամ չմշակված կաթը, կաթնամթերքը օգտագործելիս:

Առավել վտանգավոր է հիվանդ կենդանիներից ստացված պանիրը:

Քանի որ բրուցելոզի հարուցիչները արդեն ոչնչանում են 60 աստաճանի պայմաններում, ջերմային մշակման ենթարկվող կաթնամթերքը վտանգ չի ներկայացնում: Սակայն պանրի արտադրությունը, հատկապես տնային պայմաններում, ջերմային մշակում չի պահանջում, անվտանգ է պեստերիզացված կաթից ստացված պանիրը և այն պանիրը, որ 45-75 օր գտնվել է աղաջրի մեջ:

Հատուկ ոչխարի պանրի սիրահարներին խորհուրդ եմ տալիս խուսափել օգտագործումից, իսկ եթե չեք կարող խուսափել, ապա պանիր գնելուց ուշադրություն դարձրեք գույնին: Այսինքն՝ պանրի գլուխը կիսեք և ուշադրություն դարձրեք, որ կտրվածքը ամբողջությամբ լինի սպիտակ, եթե նկատում եք դեղին գույն, ինչը նշանակում է, որ պատշաճ ժամկետով չի մնացել աղաջրում, ապա խուսափեք այն գնելուց: Իսկ եթե նույնիսկ արդեն գնել եք, տան պայմաններում այն կարող եք պահել աղաջրի մեջ, առնվազն 45 օր, որից հետո հանգիստ ուտել:

Ինչպե՞ս ասում են “Береженного Бог бережет”

Առողջ եղեք և մի վախեցեք: