Միջազգային հանրությունը դատապարտել է Անկարայի ահաբեկչությունը

Աշխարհի տարբեր պետությունների ու միջազգային կազմակերպությունների ղեկավարները դատապարտել են Թուրքիայի մայրաքաղաք Անկարայում մարտի 13-ին իրականացված նոր ահաբեկչությունը: ՄԱԿ-ի գլխավոր քարտուղար Պան Կի Մունը դատապարտել է իրականացված ահ աբեկչությունը՝ իր աջակցությունը հայտնելով Թուրքիային:

Ռուսաստանի Դաշնության նախագահ Վլադիմիր Պուտինը ևս միացել է ցավակցություններին: Նախագահի խոսնակ Դմիտրի Պեսկովը ՏԱՍՍ-ին ասել է. «ՌԴ նախագահը սգում է նոր ահաբեկչական հարձակման հետևանքով մեծաթիվ զոհեր ունեցած թուրք ժողովրդի հետ»:

Միացյալ Թագավորության վարչապետ Դևիդ Քեմերոնը պայթյունից անմիջապես հետո գրառում է կատարել «Թվիթեր»-ի իր միկրոբլոգում՝ նշելով, որ Անկարայում կատարվածը պարզապես սարսափեցրել է իրեն:

Ֆրանսիայի Ելիսեյան նախագահական պալատից արած հատարարության մեջ կատարվածը որակվել է որպես «ստոր հարձակում»: «Ահաբեկչության դեմ պայքարում Ֆրանսիան Թուրքիայի կողքին է»,- ասվում է  հայտարարության տեքստում:

Անկարայի ահաբեկչությունը դատապարտել են նաև ԵԽ գլխավոր քարտուղար Թյորբյորն Յագլանդը, ՆԱՏՕ-ի գլխավոր քարտուղար Յենս Ստոլտենբերգը, Սպիտակ տան անվտանգության խորհդրի խոսնակ Նեդ Փրայսը, Սերբիայի վարչապետ Ալեքսանդր Վուչիչը, Հունաստանի, Արգենտինայի, Իսպանիայի ու Կանադայի արտգործնախարարությունները, արտաքին հարաբերությունների և անվտանգության քաղաքականության հարցերով ԵՄ բարձր հանձնակատար Ֆեդերիկա Մոգերինին, Իսրայելի վարչապետ Բենիամին Նեթենյահուն, ԵԱՀԿ գլխավոր քարտուղար Լամբերտո Զանիերը, Ուկրաինայի նախագահ Պյոտր Պորոշենկոն,  Հայաստանը, Իտալիան, Սաուդյան Արաբիան, Ադրբեջանը, Կատարը, Քուվեյթը, Հորդանանը, Լիտվան, Էստոնիան, Վրաստանը, Ռումինիան, Սերբիան, Իրաքը, Եգիպտոսը, Պակիստանը:

Անկարայում հերթական ահաբեկչությունը տեղի է ունեցել մարտի 13- ին քաղաքի կենտրոնական հատվածում` ավտոբուսի կանգառներից մեկում,որը գտնվում է Թուրքիայի վարչապետի աշխատավայրի մոտ` Գյուվեն այգու մերձակայքում: Պայթյունի ժամանակ նշված տեղանքում մեծ թվովմարդիկ են եղել: Ամբողջությամբ այրվել է մեկ ավտոբուս: 

Ահաբեկչության հետևանքով զոհվել է 34 մարդ, 125-ը տեղափոխվել են հիվանդանոցներ:

Ոստիկանության նախնական վարկածով՝ պատահարը տեղի է ունեցել ականապատված մեքենայի պայթյունի հետևանքով, որը կայանված է եղելերկու ավտոբուսների միջև: