Ինչպե՞ս ազատվել սխտորի հոտից

Սխտորը որոշ կերակրատեսակի «համ ու հոտ» է տալիս: Բայց այդ նույն հոտն այնուհետ երկար ժամանակ մնում է բերանում եւ մեծ դժվարությամբ հեռանում:

 

Սխտորի բաղադրիչներից մեկը` ալիլմեթիլային սուլֆիդը, դժվարամարս լինելու պատճառով, միայն շնչառության եւ քրտնարտադրության միջոցով է արտանետվում օրգանիզմից: Ամերիկացի գիտնականները փորձարկումներ են արել` պարզելու համար, թե ինչպես` որ ուտեստների օգնությամբ կարելի է տհաճ հոտից ազատվել, հաղորդում է Daily Mail-ը:

Հետազոտության կամավոր մասնակիցները մեծ քանակությամբ սխտոր եւ այնուհետ` տարբեր ուտելիքներ են փորձել` յուրաքանչյուր անգամ դրանց ազդեցությունը չափելով: Պարզվել է` կիտրոնի հյութը եւ անանուխը կարող են  արդյունավետ պայքար մղել տհաճ հոտի դեմ:

Նշանակալի հաջողության կարելի է հասնել նաեւ կանաչ թեյի, սպանախի եւ մաղադանոսի օգնությամբ: Այդուհանդերձ, մրցույթի բացարձակ չեմպիոնը, զարմանալիորեն, խնձորն է ճանաչվել:

Բոլոր հիշյալ ուտեստները մեծ քանակությամբ պոլիֆենոլ են պարունակում, որի օգնությամբ սխտորի սուր բաղադրիչներն արագորեն քայքայվում են: Կիտրոնի պարագայում խնդիրը թթվայնության շնորհիվ է լուծվում: Այդուհանդերձ, լավագույն արդյունքի հասնելու համար խորհուրդ է տրվում, որտեղ հնարավոր է, հակամիջոցները սխտորի հետ միասին ընդունել:

Գիտնականների պնդմամբ, բարձր յուղայնությամբ կաթը եւս օգտակար է` սխտորի տհաճ հետեւանքներից խուսափելու համար, քանի որ նվազեցնում է հոտի համար պատասխանատու տարրերի կենտրոնացման մակարդակը: Համենայն դեպս` 200 գրամի շնորհիվ ձեր շնչառությունը 50 տոկոսով թեթեւ կլինի: