Շոու բիզնեսի նախկին մտերիմ ընկերները. ի՞նչ չկիսեցին նրանք (լուսանկարներ)

 

Երգիչներ Էրիկն ու Մհերը ժամանակին մտերիմ ընկերներն էին, սակայն նրանց միջով անցավ մրցանակաբաշխություն կոչված սև կատուն և երբեմնի ընկերները դադարեցրեցին շփվել: Ասում են՝ Մհերը շատ ծանր է տարել, որ 2012 թվականին Ազգային երաժշտական մրցանակաբաշխության ժամանակ Էրիկն է արժանացել «Տարվա լավագույն երգչի» կոչմանը:  Իր հարցազրույցներից մեկում Մհերը նույնիսկ ասել էր, որ Էրիկն այդ տարի շատ աշխատանք չի արել: «Մրցանակը ինքս ինձ կտայի, որովհետև Էրիկն այս տարի միայն «Նոր ալիքին» է մասնակցել ու մեկ տեսահոլովակ թողարկել, այն էլ` Յուրամալայի կադրերով»,- մասնավորապես նշել էր երգիչը՝ մոռանալով, որ ժամանակին բարձրաձայն հայտարարում էր իր և Էրիկի մտերմության մասին:

Երգիչ Միհրան Ծառուկյանը ժամանակին բավականին ջերմ հարաբերություններ ուներ երգիչ Արսեն Սաֆարյանի հետ, նույնիսկ նրան էր վստահել իր PR արշավն ու համագործակցում էր՝ որպես պրոդյուսեր: Քաղաքում արդեն խոսում էին, որ Միհրանը փորձում է կրկնօրինակել ընկերոջն ու նրա ճանապարհով գնալ ու հանկարծ… Միհրանի ու Արսենի միջով ևս սև կատու անցավ, ու նրանք դադարեցրին համագործակցությունը: Ինչպես նման դեպքերում լինում է՝ նրանք դադարեցին նաև ընկերներ լինել:

Դերասաններ Սարգիս Գրիգորյանն ու Նարբե Պողոսյանը ժամանակին այնքան մտերիմ էին, որ համատեղ բիզնես սկսեցին: Հաճախ նրանք միասին էին կազմակերպում նաև ընտանեկան հանգիստը: Սակայն կարճ ժամանակ անց նրանք բիզնեսներն առանձնացնելու որոշում կայացրին: Թեև Սարգիսն ու Նարբեն պնդում են, որ այժմ չեն շփվում զուտ ժամանակի սղության պատճառով, պարզ է, որ եթե այդ ամենն անդրադարձած չլիներ անձնական  հարաբերություների վրա, որպես ընկերներ ժամանակ կգտնեին գոնե կարճատև հանդիպումների համար: Ի վերջո, աշխատել չի նշանակում մեկուսանալ ընկերներից:

Երգիչ Արամեն և հաղորդավար Արտավազդ Ամիրյանը ոչ միայն զարմիկներ են, այլև ժամանակին մտերիմ ընկերներ էին: Երգիչը եղբորն էր վստահել իր մենեջերի պարտականություները և սերտորեն համագործակցում էր Ամիրյանների ընտանիքի հետ: Արամեի հայտնի համերգից հետո խզվեցին ոչ միայն գործնական, այլև բարեկամանական ու ընկերական հարաբերությունները: Արամեն նույնիսկ ներկա չէր Արտավազդի հարսանիքին:

Ռեփերներ ՀՏ Հայկոյի և Միշոյի կոնֆլիկտը, թերևս, ամենաղմկահարույցն էր: Անձնական կոնֆլիկտից հետո նրանք նույնիսկ երգեր «ձոնեցին» միմյանց, վիրավորեցին ամենավերջին ձևերով, ապա հաջորդ օրն ասուլիս հրավիրեցին ու հայտարարեցին, որ իրենց միջև ամեն բան կարգին է: Որոշ ժամանակ անց Միշոն մասնակցեց Հայկոյի կազմակերպած միջոցառումներից մեկին, նրանք նույնիսկ լուսանկարվեցին միասին, սակայն երբեմնի ընկերությունն այլևս անցյալում է: Ռեփերնիերց յուրաքանչյուրը գնաց իր ճանապարհով:

Միշոյի կոնֆլիկտը միայն ՀՏ Հայկոյի հետ չի եղել: Միշոն և Սերժոն խնդիր էին ունեցել ռեփեր Համոյի հետ, ինչից հետո Համոն լքել էր «Հայ թիմը»: Ժամանակին Միշոն և Սերժոն հերքել էին, թե կոնֆլիկտ է եղել, իսկ ահա Համոն խոստովանել էր, որ վիճել է տղաների հետ, ինչն էլ պատճառ է դարձել, որ երբեմնի ընկերները ներկա չլինեն իր հարսանիքին: Ի դեպ, Միշոն ու Համոն մանկության ընկերներ էին:

Հայկո-Մկո զույգն ամենաներդաշնակներից էր հայկական շոու բիզնեսում  ու շատերի համար մեծ անակնկալ էր նրանց բաժանումը: Թվում էր՝ երբեմնի մտերիմ ընկերների միջով ոչ մի սև կատու չի կարող անցնել, բայց արի ու տես, ինչ-որ բան զրոյացրեց նրանց տարիների ընկերությունը: Հայոկն ու Մկոն այդպես էլ չեն խոսում պատճառների մասին՝ նշելով, թե կոնֆլիկտ չի եղել, սակայն այն, որ վեճ եղել է և բավականին լուրջ, ակնհայտ է:

Ժամանակին հեռուստատեսային անբաժան զույգ էին նաև Ռաֆոն ու Հովոն: Նրանք բավականին մտերիմ էին ու ամեն բան միասին էին անում, սակայն հասկացան, որ տարբեր ճանապարհներ անցնելու ցանկություն ունեն և առանձնացան որպես հեռուստատեսային դադար: Ինչպես լինում է նման դեպքերում, դրանից հետո նրանց ընկերական շփումն էլ դադարեց, իսկ պատճառը կրկին «զբաղվածությունն» էր: Ռաֆոն իր հարցազրույցներից մեկում ասել է, որ գուցե ինքն ու Հովոն մի օր կրկին դուետ կազմեն, սակայն հաստատ ոչ այս կյանքում:

«32 ակումբի» տղաները ոչ միայն սերտորեն համագործակցում էին, այլև մտերիմ ընկերներն էին, սակայն որոշակի տարաձայնություններից հետո Կարեն Բաբաջանյանն ու Վահագն Գրիգորյանը մնացին բարիկադի մի կողմում, ակումբի մյուս տղաները՝ հակառակ: Տևական ժամանակ նրանք որևէ շփում չունեին միմյանց հետ, սակայն վերջին շրջանում սկսել են շփվել: Կարենն ու Վահագնը մասնակցեցին Արամ MP3-ի՝ «Եվրատեսիլին» մասնակցելու կապացությամբ «Վիտամինի» հատուկ թողարկմանը: Դրանից հետո նրանց հարաբերությունները շարունակում են մնալ լավ, բայց ոչ նախկինի պես մտերիմ:

Երգիչ Գոռ Սուջյանը բավականին մտերիմ հարաբերություններ ուներ պռոդյուսերի՝ Վահագն Գրիգորյանի հետ, սակայն «Եվրատեսիլ» մեկնելուց առաջ Գոռն ու Վահագը  դադարեցին շփվել, քանի որ ինչ-ինչ աշխատանքային հարցերում չհասկացան իրար: Հետագայում Գոռը կոնֆլիկտ ունեցավ նաև «Դորիանս» խմբի տղաների հետ ու սկսեց անհատական գործունեությունը: Թեև նա ևս պնդում է, որ ուղղակի որոշել է սոլո կարիերա սկսել ու որևէ կոնֆլիկտ չի եղել, ակնհայտ է, որ այդպես չէ: Սոլո կարիերա սկսելու դեպքում չեն դադարում շփվել երբեմնի  մտերիմ  ընկերների հետ: