Կուսումնասիրեն գործող քաղաքապետի «առատաձեռնության» հիմքերը. «Դա կրիմինալ է».«Հայկական ժամանակ»

«Հայկական ժամանակ» թերթը գրում է. «Հրազդանի գործող քաղաքապետ, ապրիլի 17-ին տեղի ունենալիք քաղաքապետի ընտրություններում առաջադրված թեկնածու Արամ Դանիելյանը այսօր հրաժարվեց պատասխանել համայնքի վարչական ռեսուրսները չարաշահելու վերաբերյալ մեր հարցերին: Մեզ հետ զրույցում քաղաքապետն ասաց, թե հարցերը գրավոր ուղարկենք, իսկ գրավոր հարցերին այսօր չպատասխանեց:

Որ Դանիելյանը իր օգտին չարաշահում է վարչական լծակները՝ այդպիսի եզրակացության կարելի է հանգել ուսումնասիրելով Հրազդան քաղաքի 2016 թվականի բյուջեի մարտ ամսվա ծախսերի կատարողականը: «Այլ նպաստներ բյուջեից» հոդվածով ամբողջ 2016 թվականի համար նախատեսված պետական հատկացումների կեսից ավելին Դանիելյանն արդեն բաժանել է 152 քաղաքացիների: Այդ հոդվածով այս տարվա համար նախատեսվում է շուրջ 9.8 միլիոն դրամ հատկացում սոցիալապես անապահով ընտանիքներին: Հունվար եւ փետրվար ամիսներին Արամ Դանիելյանը 4 մլն 845 հազար դրամն արդեն բաժանել է «անապահով» ընտանիքների: 2015-ի նույն ժամանակահատվածում նա բաժանած է եղել նախատեսված հատկացումների շուրջ 30 տոկոսը (նախատեսված շուրջ 30 միլիոնից մարտի դրությամբ նա բնակչությանը հատկացրած է եղել 9.8 միլիոնը): 

Ընդ որում, այս տարի աջակցություն ստացած ընտանիքներին գումար է հատկացվել՝ հիմք ընդունելով բյուջեի հավելվածի մասին ավագանու որոշումը եւ անապահով բնակիչների դիմումները: Առավել տարօրինակ է, թե ինչպես են որոշվել «անապահովները»: 

Ուսումնասիրելով օգնություն ստացած քաղաքացիների ցանկը՝ «Հետք» պարբերականը պարզել է, որ քաղաքապետի որոշմամբ 70 հազարից մինչեւ 200 հազար դրամ նպաստ ստացած բազմաթիվ քաղաքացիների անուններ ընտանեկան նպաստառուների եւ եռամսյակային հրատապ օգնության ցուցակներում չկան: Այսինքն, սոցիալական ծառայության տարածքային գործակալությունները նրանց սոցիալապես անապահով չեն ճանաչել: Ստացվում է, որ անապահով լինելու հանգամանքը որոշվել է հայեցողական կարգով եւ ոչ թե հիմք ընդունելով Կառավարության սահմանած չափորոշիչները: Ավելին, 2015-ին նպաստ ստացած քաղաքացիների մեջ «Հետք»-ը հայտնաբերել է այնպիսի «անապահովների», որոնց անունը քաղաքապետարանը չգիտի:

Հրազդանի քաղաքապետի թեկնածու Սասուն Միքայելյանինախընտրական շտաբի անդամ Վիլեն Գաբրիելյանը (Նավակը Ճոճող) մեզ հետ զրույցում մեկնաբանելով նախընտրական շրջանում հատկացումների մասով Դանիելյանի առատաձեռնությունը՝ հայտարարեց, որ իրենք հետամուտ են լինելու պարզելու հրապարակված փաստերի իսկությունը եւ համապատասխան գործողությունների դիմելու. «Քանի որ պարզ չէ, թե ինչ չափորոշիչներով է առաջնորդվել քաղաքապետը համայնքային բյուջեյից այդ գումարները բաշխելուց, դա խիստ կասկածի տեղիք է տալիս, որ սա նախընտրական շրջանում վարչական լծակների կիրառման ցցուն օրինակ է եւ մենք հետամուտ ենք լինելու պարզելու դրա իսկությունը»,- ասաց Գաբրիելյանը՝ հավելելով, որ գործող քաղաքապետի գործողություններում խնդրահարույց կետերը բազմաթիվ են:

Փաստաբան Նորայր Նորիկյանն էլ այն կարծիքին է, թե քաղաքապետին վարչական ռեսուրսը չարաշահելու մեջ մեղադրելու համար պետք է համադրել՝ արդյո՞ք նախորդ տարվա նույն ժամանակահատվածում իրականացված սոցիալական հատկացումները այդ չափի են եղել, նույն սոցիալական խմբերի՞ն են տրվել, թե՞ այս տարվա ծախսերը պայմանավորված են նախընտրական տրամադրություններով եւ քողարկված ընտրակաշառք են:

Մեր դիտարկմանը, թե «Հետքի» հրապարակման համաձայն՝ քաղաքապետից աջակցություն ստացած քաղաքացիների մի մասի տվյալները առկա չեն ընտանեկան նպաստառուների եւ եռամսյակային հրատապ օգնության ցուցակներում, ինչը նշանակում է, որ չեն համապատասխանում «անապահով» կարգավիճակի համար Կառավարության սահմանած չափորոշիչներին, Նորիկյանը պատասխանեց.

«Դա կրիմինալ է արդեն: Դա քրեական գործի հիմք է: Բա ինչի՞ց ելնելով են ընդգրկել նպաստառումների ցուցակում: Դա հավելյալ ուսումնասիրման կարիք ունի, քանի որ եթե պարզվի, որ նման կարգավիճակ չունեցող անձինք ներգրավվել են նպաստառուների ցուցակում կամ ստանում են աջակցություն, որի իրավունքը չունեն կամ բալային սանդղակներով չեն համապատասխանում նպաստառուի չափորոշիչներին՝ բնականաբար այստեղ պաշտոնական լիազորությունների չարաշահման խնդիր կա եւ իրավասու մարմինները պարտավոր են զբաղվել»:

Առավել մանրամասն՝ թերթի այսօրվա համարում