Նման ռոմանտիկ բաների չեմ հավատում, ես հավատում եմ ինձ, իմ ուժերին և Աստծուն. Պարուհի Իռեն Ուլիխանովան նշել է ծննդյան 33-ամյակը

 Life.panorama.am-ը գրում է.

Հումորիստ, ռեժիսոր Վահագն Գրիգորյանի կինը՝ Սոֆի Դեւոյանի «Հոգու եւ պարի» թատրոնի մենապարուհի, ԵՊՀ-ի պարային համույթի գեղարվեստական ղեկավար Իռեն Ուլիխանովան երեկ նշել է ծննդյան 33-ամյակը, իսկ այսօր Life.panorama.am-ի հետ զրույցում պարուհին կիսվել է տպավորություններով եւ նոր տարիքում սպասվելիք անելիքներով:

«Կեսգիշերին ամուսինս հաճելի անակնկալ մատուցեց՝ ուղիղ 00:00-ին ծաղիկներով եւ փոքրիկ տորթով շնորհավորեց ինձ, ինչը շատ հաճելի էր: Գիտակցելը, որ նա հատուկ պատրաստվել էր եւ մեքենայում թաքցրել էր ծաղիկներն ու տորթը, որպեսզի ճիշտ կեսգիշերին անակնկալ մատուցի, ինչ խոսք, շատ հաճելի էր: Նույն կերպ շատ հաճելի էր, երբ կեսգիշերից սկսկած ու ողջ օրվա ընթացքում հեռախոսազանգերը գրեթե չէին դադարում, երբ տեսնում ես, որ մարդիկ հիշում են ծննդյանդ օրը, րոպեներն են հաշվում ու զանգում, ջերմ բարեմաղթանքներ հղում, հասկանում ես, որ իսկապես քեզ սիրող մարդկանցով ես շրջապատված, ինչն անգնահատելի է»,- պատմեց Իռեն Ուլիխանովան:

Ի պատասխան հարցին՝ ինչպես է հոբելյարին շնորհավորել որդին՝ Իռենը ծիծաղելով պատմեց. «Տղաս առավոտ շուտ արթնացավ, պինդ գրկեց ինձ, շնորհավորեց, ցանկաանալով, որ առողջ իր կողքին միշտ լինեմ ու հիշեցրեց՝ «Մամա ջան, հիշում ես չէ, որ հինգ օրից էլ իմ ծնունդն ա». Նրան թվում էր, թե ես կարող էի մոռանալ, ուստի հարկ համարեց իր շնորհավորանքի հետ մեկտեղ ակնարկել, որ շուտով իր ծննդյան օրն է»:

Պարուհու համար նվերների արժեքն ու ծավալը նշանակություն չունի. «Չեմ կարող նվերներն առանձնացնել, քանի որ ինձ համար իսկապես նվերի արժեքն ու ինչ լինելը կարեւոր չէ, արժեքավոր է յուրաքանչյուր նվերը, որն արվում է սիրով, ինձ համար մարդկային անկեղծ խոսքը շատ ավելի մեծ կարեւորություն ունի, քան թանկարժեք նվերը»,- նկատեց Իռեն Ուլիխանովան:

Ի դեպ՝ երեկ օրվա հերոսը մեկը չի եղել. «Այնպես է ստացվել, որ երեկ գործընկերուհիներիցս երկուսի ծննդյան օրն էլ էր, ուստի որոշեցինք միացնել եւ մեծ ու հետաքրքիր ծննդյան խնջույք կազմակերպել: Շատ ուրախ անցավ, ընտանեկան ու ընկերական ջերմ մթնոլորտում միանգամից երեք ծնունդ նշեցինք»,- նկատեց նա:

Մեզ հետ զրույցում Իռենն ասաց, որ երբեք չի վերլուծում անցած ճանապարհը, փոխարենը միշտ մտածում է անելիքների մասին.

«Ես երբեք չեմ վերլուծում անցածը, քանի որ երբեք հետ չեմ նայում, բայց մտածում եմ այսօրվա եւ վաղղվա անելիքներիս մասին: Իմ առաջ նպատակ եմ դրել, որի մասին չեմ բարձրաձայնի. Չգիտեմ՝ 33-ում կհասցնեմ այն իրականացնել, թե 35-ում, դա կարեւոր չէ, գլխավորը ձգտումն է, որպեսզի իրագործեմ այդ նպատակս: Փառք Աստծո, այսքան ժամանակ մեծ, թե փոքր քայլերով կարողացել եմ շատ բաների հասնել, հուսամ՝ կկարողանամ եւ հետագայում այդպես շարժվել»,- շեշտեց Իռենն՝ ընդգծելով, որ երազանքների չի հավատում.

«Պետք է նկատեմ, որ ծննդյանս օրերին միշտ խառը էմոցիաներ եմ ունենում, չեմ հասկանում՝ այդ օրը ես սիրում եմ, չեմ սիրում, տխուր եմ, ուրախ… իսկապես ինձ բարդ է հասկանալ, թե ինչ եմ զգում այդ օրը: Տոնական տորթի մոմերը փչելիս երազանքներ չեմ պահում, առհասարակ, նման ռոմանտիկ բաների չեմ հավատում, ես հավատում եմ ինձ, իմ ուժերին եւ Աստծուն»,- ավարտեց 33-ամյա պարուհին:

Հեղինակ՝ Անուշիկ Մելքոնյան