Սիրիայի հյուսիսում բնակվող քրդերը հնարավոր է հայտարարեն դաշնայնացման մասին. Թուրքիան այն արդեն «անօրինական» է համարել

 Սիրիացի քրդերը պատրաստ են մարտի 16-ին հայտարարել իրենց կողմից վերհասկվող տարածքներում դաշնային կառավարման համակարգ մտցնելու մասին:

Այս մասին, Reuters գործակալությանը հայտնել է սիրիական քրդաբնակ Քոբանիքաղաքում արտաքին գործերով տնօրինության աշխատակից Իդրիս Հասանը: Քոբանին Սիրիայի հյուսիսում քրդերի կողմից երկու տարի առաջ ստեղծված երեք ինքնակառավարվող շրջաններից մեկն է:

ՄԱԿ-ի անվտանգության խորհրդում դիվանագիտական աղբյուրն ավելի վաղ ԶԼՄ-ներին հայտնել էր, որ Արեւմուտքի մի շարք երկրներ դիտարկում են Սիրիայի դաշնայնացման տարբերակը, եւ իրենց գաղափարները փոխանցել են ՄԱԿ-ի Սիրիայի գծով հատուկ դեսպանորդ Ստաֆան դե Միստուրային:

Հասանը պարզաբանել է, որ իր այդ հայտարարությունը նշանակում է «քրդերի եւ բնակչության մյուս խմբերի կողմից ձեւավորված ինքնավարության կառուցվածքի ընդլայնում»: «Քրդերի կողմից վերահսկվող տարածքները կկոչվեն «Հյուսիսային Սիրիայի Ֆեդերացիա», -նշել է նա:

Իդրիս Հասանի խոսքով` ինքնավար շրջանների իշխանությունները ներկայացնելու են այդ տարածքներում բնակվող բոլոր էթնիկ խմբերի շահերը: Բանակցությունների գծով բարձրագույն կոմիտեի սիրիական ընդդիմության համակարգող Ռիյադ Հիջաբն ավելի վաղ հայտարարել էր, որ կոմիտեն մերժում է Սիրիայում դաշնային կառուցվածք մտցնելու գաղափարը:

Թուրքիայի արտաքին գործերի նախարարությունը շտապել է Reuters-ին հայտարարել, որ Սիրիայում քրդերի կողմից կառավարման դաշնային համակարգ մտցնելը «անօրինական» կլինի:

Թուրքիայի ԱԳՆ-ի համաձայն` Անկարան պաշտպանում է Սիրիայի ազգային միասնությունը, իսկ կառավարության եւ վարչական կառույցների ձեւավորումը որոշվելու է սիրիական ժողովրդի կողմից` հաշվի առնելով նոր սահմանադրությունը: