Մայրը 7 տարեկան որդուն ինքնասպանության է հասցրել․ նա ցած է նետվել պատուհանից (լուսանկարներ)

ՀԱՍԱՐԱԿՈՒԹՅՈՒՆ 18 Մարտ, 2016 13:21

Սարատովում 7 տարեկան Մաքսիմն ընկել է 10-րդ հարկի պատուհանից ու մահացել։ Սկզբում կարծիք կար, որ ծնողները գնացել են հյուր եւ դուռը փակել են որդու վրա՝ նրան դաստիարակելու համար, տղան ցանկացել է պատշգամբով անցնել հարեւանի պատշգամբ ու դուրս գալ տնից, սակայն սայթաքել ու վայր է ընկել։

Սակայն այժմ ոստիկաններն այլ վարկած ունեն։ Ձերբակալվել են երեխայի մայրն ու խորթ հայրը՝ նրանց կասկածում են Մաքսիմին ինքնասպանության հասցնելու մեջ։

Կանացի երջանկություն 28-ամյա Ելենան երկու երեխա ուներ, ամուսնալուծված էր, երբ հանդիպեց Անտոնին։ Բարձրահասակ, երիտասարդ, հետն էլ՝ երաժիշտ, իսկական արքայազն՝ սպիտակ ձիու վրա։ Նրանք ամուսնացան, երեխա ունեցան, հիմա էլ եւս մեկին են սպասում։ Թվում էր՝ իսկական կանացի երջանկությունը սա է, Ելենան տանն էր, չէր աշխատում։ Մինչ այդ Ելենան շատ դժվարությունների միջով էր անցել, առաջին ամուսինը խլել էր դստերը, կնոջը որդուն էր թողել։

Ծնողները ծեծել են:

Ոստիկանները պարզել են, որ մայրն ու 28-ամյա խորթ հայրը անընդհատ ծեծել են Մաքսիմին, նրան պարանով կապել աթոռին՝ իբր դաստիարակում են։

Որդու մարմնի կողքով է անցել:

Ընտանիքի հարեւանները պնդում են, որ ամեն ինչ հենց այդ ողբերգությանն էր տանում։ Ասում են՝ նրանց տնից հաճախ էին գոռոցների ձայներ գալիս։ «Բոլորն էլ գիտեին, որ երեխային ծեծում են, Մաքսիմը միշտ կեղտոտ շորերով էր, քաղցած։ Նա աղբն էր տանում, թափում, ու եթե տեսնում էր՝ մեկը կիսատ ձմերուկ է գցել, վերցնում, ուտում էր»,- ասում են հարեւանները։ Նրանք պատմում են, որ տղան ինքնամփոփ էր, երբեք ըներների տուն հյուր չէր գնում, միշտ տանը միայնակ նստած էր։ Հարեւանուհի Նատալյան ողբերգության օրը լսել է, որ տղան տանը լաց է լինում։

«Սկզբում լսեցի, ասես ծանր բան ընկավ, մտածեցի՝ պատուհանից աղբ են թափել։ Հետո տեսա, թե իրականում ինչ է եղել․․․Հենց այդ պահին Ելենան տուն էր վերադառնում, հարցնում եմ՝ ուր է որդիդ, ասում է՝ տանն է, մուլտֆիլմ է նայում։ Ցույց եմ տալիս մարմինը, ասում է՝ չէ, դա իմը չէ ու հանգիստ անցնում կողքով»,- պատմել է հարեւանուհին։ Այժմ ոստիկանները քրեական գործ են հարուցել թե Անտոնի, թե Ելենայի նկատմամբ։ Հարկ է նշել, որ Ելենան մեկ տարեկան երեխա ունի, եւս մեկն էլ շուտով կծնվի։

Պատրաստեց Past.am-ը: