Life.panorama.am-ը գրում է.
«Ֆուլ հաուս»-ում Գեւորգ Մարտիրոսյանի մասնակցության մասին Life.panorama.am-ը պատմել է, երբ երգիչը բոլորովին նոր էր ստացել մասնակցության առաջարկը, իսկ այսօր արդեն նաեւ դերասան հանդես եկող երգիչը պատմել է նկարահանումների ընթացքից եւ դժվարություններից:
«Իմ կերպարը «Ֆուլ հաուս»-ում դեռեւս չի հայտնվել, բայց իմ տեսարանների նկարահանումների մի մասն արդեն արվել են եւ հուրախություն ինձ՝ ամեն ինչ բարեհաջող է ընթացել: Թե որքանով եմ կարողացել ինձ դրսեւորել որպես դերասան, կդատի հեռուստադիտողը, ում կարծիքը շատ կարեւոր է ինձ համար»,- Life.panorama.am-ի հետ զրույցում նշեց Գեւորգ Մարտիրոսյանը:
Հետաքրքրվելով, թե ինչպե՞ս է անձամբ իր խաղը գնահատում, երգիչը նկատեց, որ ոչ մի անգամ պատրաստի վիճակով չի դիտել իր մասնակցությամբ սերիաները:
Գեւորգ Մարտիրոսյանի համար աշխատանքային նոր միջավայրին ինտեգրվելը շատ հեշտ է ստացվել.
«Քանի որ գրեթե բոլորին ծանոթ էր, շատերի հետ մինչ «Ֆուլ հաուս»-ն էլ լավ ընկերներ էինք, ուստի ինձ համար նոր միջավայրին ինտեգրվելը ոչ մի խնդիր չառաջացրեց, բայց պետք է հատուկ նշեմ, որ իսկապես բարձր եմ գնահատում «Ֆուլ հաուս»-ի ներքին՝ շատ ջերմ մթնոլոտը»,- նշեց նա:
Գեւորգ Մարտիրոսյանին դերասանական ունակությունները ճիշտ ցուցադրելը այնքան էլ հեշտ չեն տրվել.
«Ըստ իս՝ ոչինչ էլ հեշտ չէ, ինձ համար որպես դերասան ներկայանալը առաջին հերթին անսովոր էր, հուսամ՝ ընթացքում ավելի լավ կյուրացնեմ այս դերը եւ առհասարակ դերասանի աշխատանքը, բայց պետք է շեշտեմ, որ ես ինձ դերասան չեմ համարում, այնպես չէ, որ այս դերը խաղացի ու ես արդեն դերասան եմ»,- նշեց նա:
Տեսախցիկի առջեւ դերասանի եւ երգչի աշխատանքը Գեւորգ Մարտիրոսյանի համար խիստ տարբեր է.
«Ինձ համար դերասանի եւ երգչի աշխաատնքների տարբերությունը շատ մեծ է, եթե դերասանը խաղում է՝ չնկատելով տեսախցիկը, ապա երգիչը դա անում է ճիշտ հակառակ տեսանկյունով: Դրա համար էլ երգչի համար անսովոր է որպես դերասան ներկայանալը, չնայած, որ նա եւս աշխատում է տեսախցիկի առաջ եւ որոշակի դերասանական հմտություններ է ցուցաբերում»,- հավելեց երգիչը:
Գեւորգ Մարտիրոսյանը հատկապես իր երկրպագուների համար շեշտեց.
«Այն, որ հիմա ներկայանում եմ «Ֆուլ հաուս» սիթքոմում, չի նշանակում, որ երգարվեստն ինձ համար երկրորդ պլան է մղվել: Ես 15 տարի է՝ արդեն երգում եմ ,եւ երբեւէ երգը ինձ համար չի կարող ստվերում մնալ, պարզապես ես սիրում եմ նոր ոլորտներում ինձ փորձել, այդ առումով ռիսկով եմ: Այս պահին էլ զբաղված եմ նոր երգերով եւ շատ շուտով նոր տեսահոլովակ կներկայացնեմ»:
Երգիչը նկատեց, որ նոր երգը խիստ տարբերվող է իր երգացանկից.
«Քանի որ իմ երգերի մեծ մասը պարային, ռիթմիկ երգեր են, նոր երգս շատ կտարբերվի. առաջին անգամ ներկայացնելու եմ շատ խորը, լուրջ երգ, որի հեղինակներն են Ռիչարդ Մադլենյանն ու Սրբուհի Ստամբուլցյանը: «Դու մի լա»՝ այսպես է կոչվում երգը, որի տեսահոլովակը մոտ օրերս կնկարահանի Սյոմա Կոդաբաշյանը»,- պատմեց Գեւորգ Մարտիրոսյանը՝ խոստանալով տեսահոլովակը մինչ գարնան վերջ ներկայացնել:
