Դոնի Ռոստովի օդանավակայանում վայրէջքի պայմանները «լավն են եղել». FlyDubai

Դոնի Ռոստովի օդանավակայանում Boeing 737-800-ի վայրէջքի պայմանները «լավն են եղել»: Այս մասին հայտարարել են FlyDubai ավիաընկերության ներկայացուցիչները:

Ըստ ՏԱՍՍ-ի, ընկերության ներկայացուցիչը նշել է, որ իրենք հետեւում են թռիչքների անվտանգության ապահովման ամենաբարձր չափանիշներին:  Ավիաընկերության գործադիր տնօրեն Գեյթ ալ-Գեյթն իր հերթին կոչ է արել աղետի պատճառների շուրջ սպեկուլյացիայով չզբաղվել:

Ավելի վաղ Ռուսաստանի Հիդրոմետ կենտրոնի ղեկավար Ռոման Վիլֆանդը հայտարարել էր, որ ավիաաղետի ժամանակ եղանակային բարդ պայմաններ են գրանցվել: Նա մասնավորեցրել է, որ խոսքն օդային հոսանքների ուղղության փոփոխության մասին է. եթե 500 մետր բարձրության վրա հարավային քամի է փչում, ապա 1000 մետրի դեպքում՝ հյուսիսային: «Երբ այդպիսի երեւույթ է գրանցվում, բարձրանալու ուժը փոխվում է, եւ ինքնաթիռն անկառավարելի իրավիճակում է հայտնվում»,- նշել է մասնագետը:

FlyDubai ավիաընկերության ուղեւորատար Boeing 737-800 օդանավը Դոնի Ռոստովի միջազգային օդանավակայանում կործանվել է մարտի 19-ին: Զոհվել են ինքնաթիռի բոլոր ուղեւորներն ու անձնակազմի անդամները՝ 62 հոգի: Նախօրեին ռուսական լրատվամիջոցները տեղեկացրեցին, որ եղանակային վատ պայմանների պատճառով օդաչուներին առաջարկվել է վայրէջք կատարել Կրասնոդարում, սակայն վերջինները որոշել են ամեն դեպքում օդանավն իջեցնել Դոնի Ռոստովում: