Շրթներկը վտանգավոր է առողջության համար

Shabat.am-ը գրում է․

Շրթներկերը եւ փայլերը մեզ ոչ միայն ավելի գեղեցիկ են դարձնում, այլեւ կարող են լրջորեն սպառնալ առողջությանը, պնդում են գերմանացի գիտնականները:  Հյուսիսային Ռեյն-Վեստֆալիա երկրամասի (NRW-Verbraucherschutzministerium) սպառողների իրավունքների պաշտպանության նախարարության պատվերով իրականացված հետազոտության նոր արդյունքները եւս մեկ անգամ ապացուցել են, որ դիմահարդարման որոշ միջոցներում հանքային յուղեր կան, որոնք ենթադրաբար քաղցկեղ են առաջացնում: 

Մյունստերում քիմիական եւ անասնաբուժական հետազոտությունների լաբորատորիայում   31 դիմահարդարման միջոց են փորձարկել, որոնց թվում փայլեր եւ շրթներկեր են եղել: 

Գիտնականները հատուկ ուշադրություն են դարձրել շուրթերի խնամքի դիմահարդարման միջոցներին, որովհետեւ շրթներկերն արագ ներծծվում են եւ ուտվում, ինչի արդյունքում օրգանիզմում են հայտնվում անցանկալի նյութեր: Ընդհանուր առմամբ կանայք շրթներկ եւ փայլ են քսում օրական վեց անգամ, ինչը համապատասխանում է մոտավորապես 57 մգ մթերքի: Հետազոտության ընթացքում ինը դիմահարդարման  միջոցում հայտնաբերվել են վնասակար նյութեր` Aromatic Hydrocarbon հանքային յուղեր (արոմատիկ ածխաջրեր), կրճատ` MOAH: Այդ հավելումները վտանգավոր քաղցկեղածիններ են համարվում: Ածխաջրեր պարունակող ապրանքանիշերի անվանումները չեն հրապարակվում:  

«Բաղադրության մեջ  հայտնաբերվել է այդ արոմատիկ միացությունների մոտ  0,2 տոկոս: Դա համեմատաբար շատ է, եթե համեմատենք սննդամթերքում դրանց պարունակման վերաբերյալ նախորդ հետազոտությունների արդյունքների հետ», - պատմել է Բեատե Բրաուերը (Beate Brauer) BR հեռուստառադիոընկերությանը տված հարցազրույցում: Օրենքով արգելված է այն սնունդը, որի կազմում դրանից երեք հազար անգամ պակաս հանքային նյութեր կան: Առայժմ Եվրամիության մակարդակում որեւէ սահմանափակում չի գործում շրթներկում այդ միացության պարունակության մասին

Վտանգավոր հանքային յուղերը դիմահարդարման կազմում թաքնվում են պետրոլատում, պարաֆին, վազելին կամ վազելինային յուղ, միկրոկրիստալինային մոմ, օզորքերիտ, պերեզին անվանումների տակ: Արոմատիկ ածխաջրածինները մատչելի եւ էժան բաղադրիչներ են, հենց այդ պատճառով էլ դրանք մտնում են դեմքի եւ մարմնի շատ հայտնի քսուքների, մազերի գելերի եւ շրթներկերի բաղադրութայն մեջ: