Հայկ Պետրոսյանի «Եթե ես լինեի պապա» մոնոներկայացման պրեմիերան ու հոր՝ Վարդան Պետրոսյանի խորհուրդները

Blognews.am-ը գրում է

Հովհաննես Թումանյանի անվան Տիկնիկային թատրոնում երեկ կայացավ դերասան Վարդան Պետրոսյանի որդու՝ երգիչ-դերասան Հայկ Պետրոսյանի «Եթե ես լինեի պապա» մոնոներկայացման պրեմիերան։ BlogNews-ը ներկա է եղել ներկայացմանն ու ընթերցողներին է ներկայացնում հետաքրքիր պահերը։ Դերասանը շատ ոգևորված էր լեփ-լեցուն դահլիճի ջերմ արձագանքից, իր խոսքով՝ մեծ էներգիա ստացավ։ Հանդիսատեսնեն էլ հետևեց կատակերգերով, հեղինակային երգերով, իրական պատմություններով, իմպրովիզներով, ինտերակտիվ շփմամբ ներկայացման։ 

«Բանակում զինվորներն ապագայի 2 զարգացում են պատկերացնում՝ ամուսնանալ, գնալ խոպան կամ դեռ պարզ չէ։ Քանի որ  զինվորները շատ էին խոսում այդ մասին, իսկ միջավայրը, կամա, թե ակամա, ազդում է մարդու  վրա, ծառայության ժամանակ սկսեցի մտածել՝ ինչ կլիներ, եթե ես լինեի ամուսնացած, ունենայի ընտանիք, կին, զավակ... Երբ  զորացրվեցի, անձնական կյանքումս եղան իրադարձություններ, որոնք  մի պահ հասունացրին ընտանիք կազմելու թեման, հետո դա ինչպես հասունացավ, այդպես էլ հեռացավ, բայց այդ բոլոր մտորումները բերեցին ներկայացման գաղափարին ու ծնվեց  ներկայացման գաղափարն ու վերնագիրը՝ «Եթե ես լինեի պապա»»,- BlogNews-ի հետ զրույցում ասաց դերասանը, ով ներկայացման ընթացքում խոսում է նաև աղջիկների հետ հարաբերություններում անհաջողությունների մասին. «Ինչքան էլ ես ասող-խոսող տղայի տպավորություն եմ թողնում, աղջիկների հետ շփման մեջ մի քիչ ամաչկոտ եմ։ Ներկայացման մեջ շատ բաներ իրական էին, շատ բաներ հորինված կամ չափազանցված»։

Ոչ միայն արտաքնապես, այլև բեմում իր էներգետիկայով Հայկը չափազանց նման է հորը՝ Վարդան Պետրոսյանին։ Վերջինս, թեև ներկա չէր պրեմիերային, նախապատրաստական աշխատանքների ժամանակ մի շարք օգտակար խորհուրդներ է տվել որդուն։ «Հայրս յուրաքանչյուր հարցում կողքիս կանգնած է և խորհուրդներ է տալիս ինձ, սակայն  սա առաջին ներկայացումն էր, որի վրա միասին էինք աշխատում։ Չնայած շատ քիչ ժամանակ կար՝ 5-6 օրում որքան հասցրեց տալ իր խորհուրդերը՝ ինչպես կրճատել, բեմական կերպարներն ինչպես ներկայացնել»,-ասաց նա ու հավելեց, որ ըստ հանդիսատեսի գնահատականների էլ կհասկանա, թե ինչն ինչպես կրճատի։ Հայկի հաջորդ ներկայացումները կլինեն մարտի 28-ին և 29-ին՝ կրկին Տիկնիկային թատրոնում։

Ըստ Հայկի՝ ներկայացման գլխավոր ասելիքը խտացված է վերջին երգի մեջ, որն իր մեջ ունի հայի տեսակ. չի խոնարհվում, մինչև վերջ պայքարում է։