Կայծակնային շախմատի մրցաշարը միավորեց հայկական շախմատի երեք սերունդների ներկայացուցիչներին

 Հայաստանի շախմատային ֆեդերացիայի պատվավոր նախագահ Վանիկ Զաքարյանի 80-ամյակին նվիրված կայծակնային շախմատի մրցաշարը մեկ հարկի տակ էր հավաքել հայկական շախմատի հին և նոր սերնդի ներկայացուցիչներին: Ինչպես հաղորդում է«Արմենպրես»-ը, շախմատի տանը Հայաստանի շախմատային ֆեդերացիայի պատվավոր նախագահ, ՖԻԴԵ-ի պատվավոր փոխնախագահ, ԳԱԱ ակադեմիկոս Վանիկ Զաքարյանի 80-ամյակին նվիրված կայծակնայն շախմատի մրցաշարին մասնակցեցին անցյալի ուժեղագույն շախմատիստ վետերանները, Հայաստանի ներկայիս ուժեղագույն շախմատիստները և նոր սերնդի դեռևս պատանի, բայց միջազգային հարթակում հաջողություններ գրանցած շախմատիստները:

Հայաստանի շախմատային ֆեդերացիայի պատասխանատու քարտուղար Միքայել Անդրեասյանը լրագրողների հետ զրույցում նշեց, որ մարտի 23-ին լրանում է Հայաստանի շախմատային ֆեդերացիայի պատվավոր նախագահ, ակադեմիկոս Վանիկ Զաքարյանի 80-ամյակը, շախմատային ֆեդերացիան որոշել է կազմակերպել կայծակնային շախմատի մրցաշար, որին կմասնակցեն հայկական շախմատի երեք սերնդի ներկայացուցիչներ: «Մրցաշարին մասնակցելու են Հայաստանի ուժեղագույն շախմատիստները: Լևոն Արոնյանը չի մասնակցում, քանի որ նա այս պահին մասնակցում է հավակնորդների մրցաշարին: Մրցաշարին մասնակցում են նաև պատանի սերնդի շախմատիստներ, ովքեր իրենց ուժերը կփորձեն ուժեղագույն շախմատիստների հետ պայքարում: Մրցաշարին մասնակցում է 26 մասնակից»,- ընդգծեց Անդրեասյանը:

Նա շեշտեց, որ Հայաստանում շախմատը շատ լուրջ հիմքերի վրա է դրված, ինչում իր մեծ ներդրումն ունի Վանիկ Զաքարյանը: «Նա շախմատային ֆեդերացիան գլխավորել է շատ ծանր ժամանակահատվածում, երբ Խորհրդային Միության փլուզումից հետո Հայաստանը ձեռք էր բերել անկախություն և գտնվում էր պատերազմի մեջ: Հենց այդ տարիներին է դրվել հիմքը ու այդտեղ մեծ դեր ունի Վանիկ Զաքարյանը: Եթե դուք նայեք վիճակագրությունը, սկսած 1992թ.՝ աշխարհի և եվրոպայի շախմատի  պատանեկան առաջնություններում Հայաստանը միշտ ունեցել է չեմպիոններ, մեդալակիրներ: Այսօր մենք փաստում ենք &n bsp;Վանիկ Զաքարյանի աշխատանքի հաջողված լինելը»,- հավելեց Միքայել Անդրեասյանը:

Մրցաշարի մասնակից գրոյսմաստեր Ռոբերտ Հովհաննիսյանը լրագրողների հետ զրույցում նշեց, որ իր համար մրցաշարն ընկերական է, քանի որ նվիրված է Վանիկ Զաքարյանի 80-ամյակին: «Դրա համար ես կխաղամ առանց լարվածության, ինչպես կստացվի: Վանիկ Զաքարյանի հետ անձամբ շփվել եմ, բայց շատ քիչ են եղել այդ շփումները, որովհետև իր գործունեության ընթացքում ես շատ փոքր էի: Ես գիտեմ, որ նա շատ մեծ դեր է ունեցել հայկական շախմատի զարգացման գործում»,- նշեց Հովհաննիսյանը, ով կայծակնային շախմատի Հայաստանի վերջին առաջնության հաղթողն է:

Մրցաշարի ամենաերիտասարդ մասնակիցը 11-ամյա Մամիկոն Ղարիբյանն էր, ով լրագրողների հետ զրույցում նշեց, որ ուրախ է մրցաշարին մասնակցելու համար, քանի որ խաղալու է փորձառու շախմատիստների հետ ու փորձ է ձեռք բերելու: Մամիկոնը շախմատ խաղում է 5 տարեկանից ու երազում է լավ շախմատիստ դառնալու մասին: «2014թ. Բաթումիում մասնակցել եմ մինչև 10 տարեկան շախմատիստների միջև մրցաշարի, որտեղ գրավել եմ առաջին տեղը: Առայժմ միակ հաջողությունս դա է»,- նշեց Ռոբերտը՝ հավելելով, որ հավանում է բոլոր  հայտնի շախմատիստներին և հետևում է նրանց  խաղերին:

Վանիկ Զաքարյանի ծննդյան 80-ամյակին նվիրված կայծակնային շախմատի մրցաշարին մասնակցում էր նաև Հայաստանի շախմատի հավաքականի անդամ Տիգրան Պետրոսյանը, ով լրագրողների հետ զրույցում ընդգծեց, որ նման մրցաշարերին միշտ հաճույքով է մասնակցում, քանի որ դրանք երիտասարդ շախմատիստների համար հնարավորություն են ավելի փորձառու շախմատիստների հետ խաղալու ու փորձ ձեռք բերելու համար: 

Մրցաշարին մասնակցել է ՀՀ Նախագահ, Հայաստանի շախմատային ֆեդերացիայի նախագահ Սերևժ Սարգսյանը: Մրցաշարի  ավարտից հետո տեղի է ունեցել փակման հանդիսավոր արարողություն և մրցանակների հանձնում: