Հերոսուհուս ճիշտ հակապատկերն եմ. «Ուրիշի հոգին» հեռուստասերիալի դերասանուհի Ասյա Հովսեփյան

«Ուրիշի հոգին» հեռուստասերիալի շնորհիվ շատ երիտասարդ դերասաններ բացահայտվեցին: Նրանցից մեկը Ասյա Հովսեփյանն է, որը հեռուստասերիալում մարմնավորում է համեստ եւ զուսպ մի աղջկա` Վիկային: Քանի որ սա Ասյայի նկարահանման առաջին փորձն էր, NEWS.am STYLE-ը որոշեց զրուցել սկսնակ դերասանուհու հետ եւ սերիալի երկրպագուներին ավելի մանրամասն ներկայացնել իրենց սիրելի հերոսուհիներից մեկի մասին.

-Ասյա, որտե՞ղ ես սովորում. Ունե՞ս դերասանական կրթություն:

-Արդեն ավարտել եմ: Սովորել եմ Թատերական ինստիտուտի դերասանական-ռեժիսորական կուրսում:

-Ի՞նչը քեզ, հատկապես, գրավեց «Ուրիշի հոգին» հեռուստասերիալում եւ քո կերպարի մեջ, որ որոշեցիր անպայման նկարահանվել այնտեղ:

-Քանի որ առաջին անգամ էի նկարահանվելու, այդքան էլ տարբերություն չկար, թե ինչ կերպար կկերտեի, կարեւորը, որ աշխատանքս լիներ արդարացված: Իսկ կերպարս միանգամից սիրեցի, թեեւ, իրականում նրա հակապատկերն եմ. ոչ մի ընդհանրություն չունենք:

-Հիմա արդեն, երբ ունես նկարահանման փորձ. Հաջորդիվ ինչպիսի՞ կերպար կցանկանայիր մարմնավորել:

-Շատ կերպարներ կան, որոնց երազում եմ կերտել: Ես Վիկայի ճիշտ հակապատկերն եմ` աշխույժ, ուրախ, նպատակասլաց: Այդպիսի մի կերպարի կցանկանայի մարմնավորել:

-Արդեն հասցրե՞լ ես մտերմանալ գործընկերներիդ հետ եւ ձեռք բերել ընկերներ նկարահանման հրապարակում:

-Գործընկերներիցս շատերի հետ եմ մտերիմ, բայց կա մեկը, որի հետ դեռ ուսանողական տարիներից ենք մտերմություն արել եւ տարբեր ներկայացումներում հանդես եկել: Խոսքը Արաքս Կետիկյանի մասին է:

-Առաջիկայում նկարահանվելու նոր առաջարկներ ունե՞ս:

-Այո, ունեմ նոր առաջարկ, բայց ցանկանում եմ, որ դա հեռուստադիտողի համար լինի անակնկալ:

-Ինչո՞վ ես զբաղվում, բացի հեռուստասերիալի նկարահանումներից:

-Բացի նկարահանումներից այս պահին խաղում եմ ներկայացումներում: Ապագայում կփորձեմ հանդիսատեսի դատին հանձնել իմ բեմադրած ներկայացումը:

Զրուցեց Սյունե Առաքելյանը

Լուսանկարները` Ասյա Հովսեփյանի Facebook-ի էջից

NEWS.am STYLE