«Ունեմ հրաշալի կին, ում սիրահարված եմ արդեն 11 տարի...». Սուրեն Առուստամյանը կյանքում երազանքների իրականացման մասին. լուսանկարներ

Երևանի Կամերային երաժշտական պետական թատրոնի դերասան Սուրեն Առուստամյանը, ով հեռուստադիտողներին առավել ծանոթ է սերիալներից ու հեռուստահաղորդումներից, իրեն երջանիկ է համարում և´ գործնական, և´ անձնական կյանքում:

 

Ձեզ ենք ներկայացնում սերիալային դերասան և հանդիսավար Սուրեն Առուստամյանի անձնական ու գործնական կյանքի որոշ մանրամասներ:

 

Բավական երկար ժամանակ լինելով «Շանթ» հեռուստաընկերության դերասան՝ նա կրկին դադար է վերցրել: «Բավական երկար ժամանակ աշխատեցի «Շանթ» հեռուստաընկերության հետ. հինգ տարիների ընթացքում նկարահանվեցի 3 սերիալում: Պարզապես արդեն ժամանակն էր հեռուստադիտողին հնարավորություն տալ հանգստանալու քեզանից: Վտանգ կա, որ կհոգնեցնես ու կդառնաս անհետաքրքիր»,- հարցազրույցներից մեկի ժամանակ նշել է դերասանը:

 

Ինչպես գիտենք, սիրված դերասանն ունի ընտանիք:

Ուղիղ 11 տարի առաջ նա հանդիպեց իր երկրորդ կեսին, ում հետ ծանոթացել է ուսանողական տարիներին: Միասին սովորելիս զույգն սկսում է հանդիպել: Ամեն ինչի սեփական ուժերով հասած դերասանը սկսում է կառուցել իր երազած ընտանիքը:

 

«Գիտակցելով, թե ինչ կարևոր քայլ եմ անում և որոշում ընդունելով, որ ամեն ինչ պետք է իմ ուժերով լինի՝ աշխատել եմ մի քանի տեղ՝ հեռուստաընկերություն, թատրոն, գիշերային ակումբ (շոու-ծրագրի կազմակերպիչ, հաղորդավար): Միշտ էլ դժվար է եղել, բայց կողքիս ունեմ կին, ով ինձ սիրում է ու միասին կարողացանք հաղթահարել բոլոր դժվարությունները՝ 11 տարիների ընթացքում չկորցնելով մեր սերը: Մեր ընտանիքում կա սեր, համաձայնություն և ջերմություն: Կնոջս հետ նույն կուրսն ենք ավարտել, աշխատել ենք թատրոնում, նկարահանվել սերիալում: Երբեք չենք խանգարել միմյանց, երբեք թատրոնը, կինոն տուն չենք բերել»,- ասում է նա:

Դերասանն այսօր ապրում է իր՝ սիրով ու հանգստությամբ լի ընտանիքում:

«Ես չէի էլ կարող պատկերացնել, որ մի օր կապրեմ ու կունենամ այն, ինչ մանկուց երազել եմ: Իսկապես, երբ հավատում ես, երազանքներն իրականանում են: Ունեմ երկու հրաշք բալիկներ, կին, ով միշտ իմ կողքին է»,- խոստովանում է դերասանը:

Պատրաստեց Past.am-ը: