Թբիլիսիի Պ.Ադամյանի անվան հայկական թատրոնում ապրիլից մեկնարկում է կապիտալ վերանորոգումը

 Թբիլիսիի Պ.Ադամյանի անվան հայկական պետական դրամատիկական թատրոնում ապրիլից մեկնարկում է կապիտալ վերանորոգումը: «Արմենպրես»-ի հետ զրույցում այս մասին նշեց թատրոնի գեղարվեստական ղեկավար Արմեն Բայանդուրյանը:

«Թատրոնում ապրիլից սկսում է վերանորոգումը: Այսօր թատրոնը ֆինանսավորվում է Վրաստանի մշակույթի նախարարության կողմից: Թատրոնը կարծես թե ոչ մի խնդիր չունի: Մեզ ոչ ոք չի հուշում` ինչ և ինչպես բեմադրենք: Ազատություն է ստեղծագործական իմաստով: Կապիտալ վերանորոգում է լինելու, շենքը վթարային է, ֆինանսավորումը ևս Վրաստանի մշակույթի նախարարությունն է տրամադրում»,-տեղեկացրեց նա:

Արմեն Բայանդուրյանը նշեց, որ Հայաստանը ևս ուշադիր է թատրոնի նկատմամբ:

«Հետևում են, թե ինչ ենք անում, ՀՀ մշակույթի, սփյուռքի, արտաքին գործերի նախարարները պատրաստ են օգնել: Թբիլիսիի հայկական թատրոնը սերտորեն կապված է հայկական բոլոր թատրոնների հետ»,-շեշտեց նա:

Արմեն Բայանդուրյանը առանձնահատուկ կարևորեց այն փաստը, որ թատրոնի ներկայացումներում հանդես են գալիս երիտասարդ կադրեր:

«Ամենակարևորը` զբաղված է թատրոնի երիտասարդությունը: Այսօր երիտասարդությունն այնպիսի համարձակություն ունի, որ թատրոնի խաղացանկի 90 տոկոսը երիտասարդ դերասանների ուսերին է: Երիտասարդներ, որոնք ստացել են կրթություն Թբիլիսիում` Շ. Ռուսթավելու անվան ինստիտուտում: Թատրոնն ապրում է ինչպես բոլոր մյուս թատրոնները` ունենք լավ, վատ, միջին ներկայացումներ»,-հավելեց նա:

Թբիլիսիի Պ.Ադամյանի անվան պետական հայկական դրամատիկական թատրոնը պատրաստվում է այս տարի ակտիվ գործունեություն ծավալել:

«Մայիսի վերջին և հունիսի սկզբին գնալու ենք հյուրախաղերի Երևան, Վանաձոր, Գյումրի, Ախալքալաք, Նինոծմինդա, Ախալցխա, մասնակցելու ենք Վրաստանում կայանալիք թատերական փառատոնի` նվիրված Նոդար Դումբաձեին: Վրաստանի բոլոր թատրոնները մասնակցում են այդ փառատոնին»,-եզրափակեց Թբիլիսիի Պ.Ադամյանի անվան հայկական դրամատիկական թատրոնի գեղարվեստական ղեկավարը:

Հ.Պարոնյանի անվան երաժշտական կոմեդիայի պետական թատրոնի բեմում մարտի 25-ին թատրոնը հանդես եկավ «Սովորական պատմություն» ներկայացումով: Թբիլիսիի Պ. Ադամյանի անվան հայկական պետական դրամատիկական թատրոնի հյուրախաղերն անցկացվում են ՀՀ վարչապետ Հովիկ Աբրահամյանի հովանու ներքո և մշակույթի նախարարության աջակցությամբ:

Թբիլիսիի Պ. Ադամյանի անվան հայկական պրոֆեսիոնալ պետական դրամատիկական թատրոնը Հայաստանի սահմաններից դուրս գործող միակ պետական հայկական թատրոնն է: Հիմնադրման օրվանից թատրոնը մեծ դեր է խաղացել Թբիլիսիի հայերի մշակութային կյանքում` միաժամանակ հանդիսանալով յուրահատուկ կամուրջ հայ-վրացական բարեկամական հարաբերություններում: Թբիլիսիում հայկական թատրոնի սկզբնավորման պատմությունն սկսվում է 1824 թվականից, երբ Ներսիսյան դպրոցում սկսել էին բեմադրել հայերեն ներկայացումներ: Արդեն 1856 թվականին այստեղ հիմնվել էր պրոֆեսիոնալ հայկական թատրոն, որը գլխավորում էր Գևորգ Չմշկյանը: Հայկական դրամատիկական թատրոնը, որը վերանվանվել է Պ. Ադամյանի անվան 1991 թվականին, գլխավորում է գեղարվեստական ղեկավար Արմեն Բայանդուրյանը: