Միշտ պարտվում եմ հայրիկիս. Ադրիանա Գալստյանը` Զատիկի սիրելի ավանդույթի մասին

Style.news.am-ը գրում է.

Այսօր աշխարհի մի շարք երկրներում տոնում են Զատիկը` Հիսուս Քրիստոսի հրաշավառ Հարության տոնը: Հայաստանում տոնը նշվում է մեծ շուքով եւ համեստ, բայց ախորժաբեր սեղաններով: Իսկ տոնի ամենակարեւոր խորհրդանիշը գունավոր հավկիթներն են, որոնցով ընտանիքի անդամները ուտելուց առաջ կռվում են` պարզելու, թե ում հավկիթն է ավելի պինդ.

Դերասանուհի Ադրիանա Գալստյանի համար Զատիկն ամենասիրելի տոներից է.

«Այս օրը միշտ նշում եմ ընտանիքիս անդամների հետ եւ մեծ հաճույքով եմ հանձն առնում նախապատրաստական աշխատանքները` ներկում եմ հավկիթներ, պատրաստում եմ մեր շատ սիրելի չամիչով փլավը, զարդարում սեղանը ամենատարբեր խորհրդանիշներով»,-NEWS.am STYLE-ի հետ զրույցում նշեց Ադրիանան, որը տոնի խորհրդանիշ հավկիթները միշտ նախընտրում է ներկել կարմիր գույնով.

«Հավկիթը խորհրդանշում է մեր երկրագունդը, իսկ կարմիրը Քրիստոսի` մեր մեղքերի համար  թափած արյունն է»:

Ադրիանան նաեւ շատ է սիրում հավկիթ կոտրելու ավանդույթը.

«Այս խաղը միշտ հայրիկիս հետ եմ խաղում եվ միշտ պարտվում եմ»,-ասում է դերասանուհին, որը տոնը սիրում է այն խորհրդանշող մի քանի պատճառներով.

«Այս օրը մարդկությունը, կարծես, ազատվում է մեղքերից. Չէ՞ որ Զատիկ նշանակում է զատում, բաժանում եւ հեռացում մեղքերից: Շատ ուրախ եմ, որ բոլոր հայ ընտանիքներում այս օրը վերածվում է մեծ տոնի: Դա խոսում է այն մասին, որ մենք հավատքով լի ազգ ենք: Ի վերջո, «Քրիստոս հարյավ ի մեռելոց». «Օրհնյալ է Հարությունը Քրիստոսի»»:

Սյունե Առաքելյան