Փաստ է՝ Կարեն Վարդանյանը հանցագործության զոհ է դարձել. Դանիել Իոաննիսյան

Մարտի 17-ից անհետ կորել է «Իրազեկ քաղաքացիների միավորում» հասարակական կազմակերպությունում որպես գլխավոր փորձագետ աշխատող Կարեն Վարդանյանը: Կարենի ֆեյսբուքյան էջում նշված է, թե նա մեկնել է ԱՄԷ և այնտեղ աշխատանք է գտել, սակայն այդ օրը Երևան-Դուբայ չվերթ չի եղել: Վարկած կա, որ նա Մոսկվայում է, քանի որ այդ ժամին միայն Երևան-Մոսկվա չվերթ է եղել:

Պատասխանելով ընկերների հարցերին՝ նա միայն գրել է հետեւյալը. «Էմիրատներում ինձ արդեն աշխատանք եմ գտել»: Ըստ որոշ տեղեկությունների՝ Կարեն Վարդանյանը վերջին շրջանում ինչ-ինչ ֆինանսական խաբեության առաջ է կանգնել եւ նրա բնակարանը ձեռքից «վերցրել են»: Այս առիթով «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը ֆեյսբուքյան իր էջում գրել էր.

«Ի՞նչ գիտենք Կարեն Վարդանյանի մասին.

1. Կարենը բոլորին ասել է, որ ինչ-որ բիզնես պայմանագրերի ստորագրման համար ամսի 17-ին թռնում է Դուբայ, 2. Ամսին 17-ին Երևան-Դուբայ չվերթ չկա, 3. Կարենը նախկինում այլ խարդախությունների զոհ եղել է, իրեն հեշտ է խաբելը, հեշտ է վստահության մեջ մտնելը, 4. Սեպտեմբերին իր բնակարանը գրանցել է իր հարևանի անունով, որ 300 հազար դրամի ԴԱՀԿ կալանքը բնակարանի վրա չտարածվի, 5. Կարենի թռնելուց մի քանի օր անց հարևանը փոխել է տան կողպեքը ու սկսել է տանից հանել Կարենի իրերը, 6. Այդ հարևանը Կարենի ու յուր բնակարանի մասին իրարամերժ ստեր է ասում՝ «բա Կարենը ինձ էնքանա սիրում, որ տունը ինձա նվիրել», 7. Կարենը պետք է ամսի 24-ին ետ գար, բայց ետ չի եկել: Որևէ կոնտակտի դուրս չի գալիս, 8. Կարենի մոտիկ բարեկամներն ու ընկերները որևէ լուր չունեն, 9. Կարենը չուներ այնպիսի պարտքեր, որոնց համար պետք է փախներ երկրից, 10. Ոստիկանները չուզենալով վերցրեցին իմ հաղորդումը, ուր նշել ենք խարդախության և թրաֆիկինգի կասկածների մասին, խնդրեցինք գտնել Կարենին, պաշտպանել Կարենի գույքը»:

Այս գրառումից հետո Իոաննիսյանը որոշ ժամանակ անց մեկ այլ գրառում է արել։

«1. Կարենի որոնմամբ ու մանրամասների բացահայտմամբ իրար օգնելով զբաղված ենք ընկերներս ու ոստիկանությունը:

2. Բավականին քչփորել ենք, լիքը օպեր-աշխատանքներ ենք արել, որի արդյունքում բազում կարևոր տեղեկություններ ենք հավաքել ու փոխանցել ոստիկանությանը: Հույսով եմ, որ եթե ոստիկանությունը իր մասով որոշ տեղեկություններ արագորեն պարզի, մենք առաջիկա օրվա ընթցքում դուրս կգանք հետքի վրա:

3. Այս պահին որևէ լավ լուր չկա: Բավականին տխուր սցենարներով պատկեր է կառուցվում: Ինձ համար արդեն փաստ է, որ Կարենը հանցագործության զոհ է, բայց պարզ չէ, թե կոնկրետ ի՞նչ հանցագործության:

4. Մենք չգտանք որևէ պատճառ, որի համար Կարենը ցանկանար փախչել: Ինքը չուներ լուրջ պարտքեր: 5. Այլ մանրամասներ չեմ կարող հայտնել, քանի որ վախենում եմ, որ դա խանգարի բացահայտմանը»։

Լիլիթ Լալայան