Պատերազմի դեպքում հայկական բանակը պատրաստ է յուրաքանչյուր մարտական գործողություն տեղափոխել այլ տարածքներ. Սեյրան Օհանյան

Հայկական բանակն ամեն ինչ անում է, որ պատերազմ չլինի, բայց եթե խաղաղություն ես ուզում, պետք է պատրաստվես պատերազմի: Այսպիսին էր ՀՀ պաշտպանության նախարար Սեյրան Օհանյանի արձագանքը «Արի տուն» հայրենաճանաչության ծրագրի մասնակիցներից մեկի հարցին: 15 երկրից հայրենիք եկած 100-ից ավելի պատանիներ ու աղջիկներ հուլիսի 24-ին հյուրընկալվել էին պաշտպանության նախարարությունում:

Երիտասարդները նախարարին հարցեր ուղղեցին, որոնք հիմնականում կապված էին հնարավոր պատերազմի դեպքում Հայաստանի խաղաղության ապահովման խնդրի հետ: Ռուսաստանաբնակ պատանիներից մեկը նախարարին նման հարց տվեց` «եթե Հայաստանի ու Ադրբեջանի միջև կռիվ լինի, Ռուսատանը կօգնի մեզ», որին Սեյրան Օհանյանը պատասխանեց. «Հայկական բանակի ամեն օրը լցված է բազմաթիվ միջոցառումներով, որպեսզի մեր բանակն ավելի ուժեղանա: Ամեն օր հայկական բանակը զբվաղվում է  իր կատարելագործմամբ: Բայց մենք ամեն ինչ անում ենք, որ ոչ միայն ռազմական ուժով, այլև դիվանագիտական կարողություններով, ռազմատեխնիկական համագործակցությամբ ստեղծենք պայմաններ, որ միջազգային կառույցներն ու անվտանգության համակարգերը, ինչպես օրինակ ՀԱՊԿ-ն, ՆԱՏՕ-ն, իրենց ուժերն ուղղեն պատերազմ չլինելուն: Բայց եթե հանկարծ պատերազմ լինի, մենք կռվելու որևէ խնդիր չունենք»:

Ինչ վերաբերում է Ռուսաստանի աջակցությանը, ապա նախարարի խոսքով` ՀԱՊԿ-ի համաձայնագրերի և երկկողմ համագործակցության շրջանակներում Ռուսաստանը պարտավորվում է իր ներդրումն ունենալ Հայաստանի անվտանգությունն ապահովելու գործում: «Սակայն մեր անվտանգության ամենամեծ ապահավողը հայ ժողովորդի ներուժի օգտագործումն է: Մեր բոլոր հնարավորությունները` կրթական, գիտական, տեղեկատվական, լոբբիստական, պետք է օգտագործենք դեպի Հայաստան եկող բոլոր սպառնալիքները փոքրացնելու համար: Եթե կռիվ լինի, հայկական բանակը հենց դրա համար է, որ պաշտպանի մեր հայր ենիքը, ավելին` յուրաքանչյուր մարտական գործողություն տեղափոխի այլ տարածքներ»,- ավելացրեց նախարարը:

Վիրահայ մեկ այլ պատանի էլ հետաքրքրվեց՝ արդյոք հայկական բանակը կարո՞ղ է հետ նվաճել մեր պապենական հողերը: «Այսօր մենք պատաստ ենք մեր հայրենիքը պաշտպանել և մեծ Հայաստան դառնալու ճանապարհին ենք, անկասկած: Հայ ժողովուրդը միշտ ատամները կրճտացնելով  ըմբոստացել է, որպեսզի մեր ապագան ավելի անվտանգ տեսնի: Արցախահայության պաշտպանությունը և շատ բնակավայրերի ազատագրումն ապացուցել է, որ մենք այդ ճանապարհին ենք: Ձեր ասածը կարճ ժամանակահատվածում չենք կարող իրականացնել: Մենք պետք է աշխատենք ավելի հզորանալ»,- նշեց Սեյրան Օհանյանը:

Մինսկից մի աղջնակ էլ հարց չուղղեց, այլ պարզապես շնորհակալություն հայտնեց նախարարին ու հայկական բանակին: «Երբ Հայաստանում էի ապրում, այնքան էլ չէի գնահատում հայկական բանակը, գնացի այնտեղ ապրելու, հասկացա, թե որքան  ուժեղ ենք մենք: Ես շատ հպարտ եմ, որ իմ եղբայրները ծառայել են հայկական բանակում: Ուրախ եմ, որ իմ ընկերներն էլ պատրաստվում են գալ ու ծառայել հայոց բանակում»,- ասաց աղջնակը:

Նրան ի պատասխան` պաշտպանության նախարարը շեշտեց, որ նման գնահատականները ոգևորում են իրենց ու մեծացնում ձգտումն ավելի մեծ հաջողությունների հասնելու:«Շնորհակալ եմ ձեր ծնողներին, ձեր եղբայրներին, որ գալիս ու ծառայում են: Արցախյան պատերազմի փորձը ցույց է տվել, որ հայերը քիչ ուժերով հակառակորդի մեծ ստորաբաժանումներին կարողացել ենծնկի բերել»,- ընդգծեց նախարարը:

Նա նշեց, որ նմանատիպ հանդիպումների ժամանակ միշտ աղջիկները հարց են բարձրացնում, թե արդյոք աղջիկները ծառայելու են հայկական զինված ուժերում, թե ոչ:

«Ես նրանց պատասխանում եմ` հայ տղամարդիկ չեն թողնում, որ հայ աղջիկները ծառայեն: Սակայն բանակում կան բազմաթիվ աղջիկներ, ովքեր ծառայում են ոչ միայն բուժական անձնակազմում, կապի ապահովման բաժիններում, այլև հատուկ ստարաբաժանումներում: Մենք ունենք լավ պատրաստված դիպուկահարներ, հայ աղջիկները ընդունվում են ռազմական ուսումնական հաստատություններ: 3 հոգի արդեն ավարտել են բուհը, 11 հոգի սովորում են: Նրանց մեծ մասը Տավուշից են»,- հայտնեց նախարարը: Նրա խոսքով` այս պահին ավելի նպատակահարմար է, որ հայ աղջիկները «օրորոցային վրեժ&raq uo; լուծեն. որքան շատ երեխաներ ծնվեն, մենք այնքան ավելի հզոր կլինենք: