Գեղարքունիքում ավարտվեց Հայաստանի շախմատի համադպրոցական 10-րդ օլիմպիադայի մարզային փուլը

 Գեղարքունիքի մարզում ավարտվեց Հայաստանի շախմատի համադպրոցական 10-րդ օլիմպիադայի  մարզային փուլը, որը մեկնարկել էր 2015 թվականի հոկտեմբերի 1-ին:

Ինչպես  տեղեկացրին  Գեղարքունիքի մարզպետարանի աշխատակազմի կրթության, մշակույթի եւ սպորտի վարչությունից, շախմատի համադպրոցական  օլիմպիադան  համատեղ կազմակերպում են ՀՀ շախմատի ֆեդերացիան եւ ՀՀ կրթության եւ գիտության նախարարությունը: Օլիմպիադային մասնակցում են Հայաստանի, Արցախի եւ Ջավախքի դպրոցականները, իսկ  9-րդ տարին անընդմեջ այս մրցաշարին իր աջակցությունն է բերում Հայկական Բարեգործական Ընդհանուր Միությունը:

Օլիմպիադայի մարզային փուլին մարզի յուրաքանչյուր տարածաշրջանից մասնակցում էր մեկ թիմ:  Չորսական անդամներից բաղկացած այս հինգ  թիմերը հաղթող էին ճանաչվել նախորդ փուլերում: Խաղն ընթանում էր արագ շախմատի կանոններով:

Մրցաշարում հաղթող ճանաչվեց  եւ մայիս ամսին Ծաղկաձորում կայանալիք շախմատային օլիմպիադայի հանրապետական փուլի մասնակցության  իրավունք նվաճեց Գավառի թիվ 1 հիմնական դպրոցի թիմը:

Մարզային փուլին մասնակցող 20 դպրոցականներին «Հայկական Բարեգործական Ընդհանուր Միության ներկայացուցիչները նվիրեցին  շախմատի մասին պատմող գրքեր: Հաղթող թիմը  ստացավ  նաեւ հաղթական գավաթ, իսկ թիմի անդամները՝  մեկական պլանշետ: Կազմակերպիչների հավաստմամբ՝  օլիմպիադայի շնորհիվ ի հայտ են եկել  շնորհալի աշակերտներ, դպրոցականների շրջանում աճել է հետաքրքրությունն արքայական խաղի հանդեպ:

Խոսրով Խլղաթյան