Մենք բավարարված չենք միջազգային արձագանքներից. Վահրամ Բաղդասարյանը՝ ադրբեջանական ագրեսիայի մասին

ԱԺ ՀՀԿ խմբակցության ղեկավար Վահրամ Բաղդասարյանը Past.am-ի հետ զրույցում ասաց, որ Ադրբեջանն իր հերթական ագրեսիվ և ահաբեկչական գործողություններով փորձում է իրական իրավիճակից շեղել ուշադրությունը:

«Բազմիցս քննադատելով ԵԱՀԿ Մինսկի խմբին, միջազգային կառույցներին՝ նրանք նախապատրաստում էին այս ագրեսիան: Առաջին անգամ չէ, որ կարևորագույն հանդիպումների ժամանակ նման իրավիճակներ են ստեղծվում: Այս անգամ խոսքը վերաբերում է ԱՄՆ-ում նախագահների հանդիպմանը: Ագրեսիայի միջոցով ցանկանում են ինչ-որ բան ապացուցել, սակայն ապարդյուն»,- նշեց պարոն Բաղդասարյանը:

Անդրադառնալով միջազգային կառույցների գնահատականներին՝ Բաղդասարյանն ասաց.«Ինձ թվում է, որ միջազգային կառույցները պետք է շատ արագ արձագանքեն այս խնդրին, հանեն հավասարության նշանը: Հակառակ դեպքում մենք ստիպված կլինենք զոռով լռեցնել թշնամուն, ինչն աննախադեպ հետևանքներ կարող է ունենալ Ադրբեջանի համար:

Բոլոր արձագանքներին ուշադիր հետևել եմ: Միջազգային արձագանքները բավարար չեն: Բազմիցս նշվել է, որ պետք է հանձնաժողովներ ստեղծվեն, սարքեր տեղադրվեն, որպեսզի իմանան՝ ո՞վ է սկսում ագրեսիան: Ադրբեջանը դրա համար վայնասուն է բարձրացնում: Այս ամենը չէր լինի, եթե ժամանակին չպատժվեին:Մենք բավարարված չենք միջազգային արձագանքներից, քանի դեռ հստակ և անվանական քննադատություններ չեն լինում»:

Լևոն Փանոսյան