Ադրբեջանն այս ավանտյուրայից դուրս է գալու շատ ավելի վատ վիճակում, քան թե կա հիմա.Արման Նավասարդյան

Արտակարգ և լիազոր դեսպան Արման Նավասարդյանը Past.am-ի հետ զրույցում նշեց,որ Ադրբեջանի կողմից նման ագրեսիա սպասելի էր: Ըստ նրա՝ ռուսական և ամերիկյան կենտրոնների մասնագետները կանխատեսել էին, որ այս տարի սպասվում է էսկալացիա:

«Stratfor կենտրոնը և ռուսական «Վալդայ» ակումբը նման կանխատեսումներ արել էին: Դժվարանում եմ ասել՝ ինչպես կզարգանան դեպքերը, բայց չեմ կարծում, որ պատերազմական գործողությունների կհասնի հարցը: Արդեն միջազգային կազմակերպություններն ու մեծ տերություններն են ոտքի կանգնել, օրինակ՝ Ռուսաստանը:

Դուք գիտեք, որ այսօր եղավ Պուտինի հայտարարությունը, պաշտպանության նախարարի հայտարարությունը, արտաքին գործերի նախարարների բանակցությունները: Ես կարծում եմ, որ Ադրբեջանը, իհարկե, մեծ ավանտյուրայի է գնում և կրակի հետ է խաղում: Այս ավանտյուրայից դուրս է գալու շատ ավելի վատ վիճակում, քան թե կա հիմա»,- նշեց դիվանագետը: Պարոն Նավասարդյանի խոսքով՝ մեծ տերությունները, հատկապես Ռուսաստանը կարևոր դեր ունեն խաղալու:

«Թուրքիան էլ կարող է խառնվել: Թուրքիայի հետևում էլ ՆԱՏՕ-ն է կանգնած : Այնուամենայնիվ, տերություններն այնքան էլ շահագրգռված չեն դրանում,նրանք ամեն ինչ կանեն,որպեսզի պատերազմ չլինի: Բայց դե ափսոս է, որ երիտասարդներն են զոհվում»,-ասաց մեր զրուցակիցը:

Արման Նավսարդյանն ընդգծեց, որ գործընթացը պատահական չէ: Նրա համոզմամբ` միջազգային իրավիճակը հուշում էր այս մասին, Սիրիայի իրավիճակն էլ է իր արձագանքը գտնում այստեղ:

«Ադրբեջանը ուզում է օգտված լինել այս ամենից: Պետք էր սպասել նաև այդ քայլը, երբ չկայացավ Օբամայի, Սարգսյանի և Ալիևի միջև եռակողմ հանդիպումը»,-եզրափակեց պարոն Նավասարդյանը:

Լևոն Փանոսյան