Հայ հրաձիգների ներկա սերնդից արդեն բարձր արդյունքներ են ակնկալվում

Աշխարհի 4-ակի, Եվրոպայի 16-ակի, Խորհրդային Միության եւ Հայաստանի բազմակի չեմպիոն, 50-ից ավելի ռեկորդների հեղինակ, սպորտի վաստակավոր վարպետ, անվանի մարզուհի Զինաիդա Սիմոնյանի հիշատակին նվիրված մրցաշարում խաղարկվել է 24 մեդալ:

«Արմենպրես»-ը հաղորդում է, որ 2012 թ. սկսած Հայաստանի հրաձգության ֆեդերացիայի նախագահ Արթուր Հովհաննիսյանի նախաձեռնությամբ ամեն տարի կազմակերպվող մրցաշարին այս տարի մասնակցել են ոչ միայն Երեւանի, այլեւ մարզային թիմերը` ի դեմս Վանաձոր քաղաքի թիմի եւ Գյումրու քաղաքապետարանի հրաձգության մարզադպրոցի, բացի այդ առաջին անգամ մրցաշարի պատմության մեջ մասնակցել է նաեւ Վրաստանի հրաձգության հավաքական թիմը` 6 ուժեղագույն մարզիկով, այդ թվում` Օլիմպական խաղերի չեմպիոնուհի Նինո Սալուկվաձեն:

«Հուշամրցաշարին մասնակցող հայ մարզիկ-մարզուհիները չափազանց երիտասարդ են, եւ մենք մեծ հույսեր ենք կապում նրանց` հետագայում հաջողության հասնելու հետ: Օլիմպիական վարկանիշ նվաճելը նրանց ուժերից վեր չէ, եւ դեռեւս ակնկալիքներ ունենք: Հատկապես մայիսին Մյունխենում վարկանիշային մրցաշար կա, որտեղ, լավ ելույթների դեպքում, հնարավորություն ունենք Սպիտակ քարտ ստանալու եւ Օլիմպիական խաղերին մասնակցելու»,- «Արմենպրես»-ի հետ զրույցում նշեց Հայաստանի հրաձգության ֆեդերացիայի գլխավոր քարտուղար Արեգ Սարիբեկյանը` հավել ելով, որ Սպիտակ քարտն ուղղակիորեն չի տրվում, այն դեռ պետք է վաստակել մոտակա ելույթներին:

Զինաիդա Սիմոնյանի հուշամրցաշարին մասնակցող հրաձիգները երկրորդ օրը մրցել են գնդակային հրաձգության օդամղիչ ատրճանակ ու վազող թիրախ` նորմալ եւ խառը վազք վարժություններից: «Վազող թիրախ` խառը վազք, 10մ, 2x20 կրակոց» վարժության տղաների պայքարում 1-ին տեղը գրավեց 20-ամյա Շանթ Սարգսյանը, ով Բանակի կենտրոնական մարզական ակումբի անդամ է: Երկրորդ տեղը բաժին ընկավ Ռազմիկ Մինասյանին, իսկ 3-րդում 18-ամյա Հովհաննես Խաչատրյանն էր` Գյումրու քաղաքապետարանի հրաձգության մարզադպրոցից:

«Վազող թիրախ` խառը վազք, 10մ, 2x20 կրակոց» վարժության աղջիկների պայքարում հաղթող ճանաչվեց 20-ամյա Լիլիթ Մկրտչյանը Երեւանի հրաձգության մանկապատանեկան մարզադպրոցից: 2-րդ տեղը գրավեց 14-ամյա Գոհար Հարությունյանը, իսկ 3-րդ տեղում փորձառու Լաուրա Ավետիսյանն էր:

«Օդամղիչ ատրճանակ, 10մ, 60 կրակոց» վարժության տղաների պայքարում առաջին երկու հորիզոնականները գրավեցին Վրաստանի ներկայացուցիչները. 1-ին տեղը բաժին ընկավ 19-ամյա Ցոտնե Մաճավարիանիին, 2-րդը` 16-ամյա Ակակի Մոսուշվիլիին: 3-րդ տեղը գրավեց 28-ամյա Նորայր Առաքելյանը:

«Օդամղիչ ատրճանակ, 10մ, 40 կրակոց» վարժության աղջիկների պայքարում կրկին հաղթողը վրացի էր` Օլիմպական խաղերի չեմպիոնուհի Նինո Սալուկվաձեն: Հաղթողից շատ հետ չմնաց 22-ամյա Էլմիրա Կարապետյանը, ով Հրաձգության հանրապետական մարզադպրոցն էր ներկայացնում: 3-րդ հորիզոնականում փորձառու Գոհար Դանիելյանն էր` Երեւանի հրաձգության մանկապատանեկան մարզադպրոցից:

Հաղթող մարզիկներն արժանացան դրամական պարգեւների, դիպլոմների ու մեդալների: Մրցաշարի կազմակերպիչները պարգեւատրվեցին նաեւ հաղթող մարզիկների անձնական մարզիչները: Այս տարի Զինաիդա Սիմոնյանի հիշատակին նվիրված մրցաշարում մասնակիցների քանակը նախորդ տարվա համեմատ ավելացել էր 15-ով` հասնելով 85-ի: