Տղես նշանված էր, նպատակներ ուներ, հիմա հարսս է զանգում ի՞նչ ասեմ. Թալիշում 23-ամյա զինծառայող է զոհվել (լուսանկար)

Shabat.am-ը գրում է.

Ղարաբաղա-ադրբեջանական հակամարտ զորքերի շփման գծում երեկ՝ ապրիլի 3-ին, հակառակորդի արձակած կրակոցների հետևանքով զոհվել է պայմանագրային զինծառայող՝ 1993թ.-ին ծնված Մերուժան Արթուրի Ստեփանյանը:

«Տղես նշանված էր, նպատակներ ուներ, հիմա հարսս է զանգում ի՞նչ ասեմ, ասեմ՝ էլ չկա՞»,-Shabat.am-ի հետ զրույցում ասաց զինծառայողի հայրը՝Արթուր Ստեփանյանը, ով գտնվում էր Մուրացանի զինվորական հոսպիտալում:

Նշենք, որ Մերուժան Ստեփանյանը Գյումրիից էր, երեք տարի էր, ինչ ծառայում էր Թալիշում որպես պայմանագրային զինծառայող:

Հիշեցնենք, որ ապրիլի 3-ի լույս 4-ի գիշերը ղարաբաղա-ադրբեջանական հակամարտ զորքերի շփման գծի ողջ երկայնքով հակառակորդը ականանետերից ու հրանոթներից շարունակել է արկակոծել ՊԲ առաջնային դիրքերն ու մերձակա հայկական բնակավայրերը: Առավոտյան ժամը 07:00-ի սահմաններում առավել ինտենսիվ հրետակոծություններ են սկսվել շփման գոտու հարավարևելյան և հյուսիսարևելյան ուղղություններով: Ադրբեջանական բանակը կիրառում է 152 միլիմետրանոց հրանոթներ, "Գրադ" կայանքներ և տանկեր: Հակառակորդի ագրեսիվ գործողությունները ճնշելու ուղղությամբ ՊԲ առաջապահ ուժերը ձեռնարկում են բոլոր անհրաժեշտ միջոցները և վստահաբար իրականացնում իրենց առջև դրված մարտական խնդիրները: Հայկական ստորաբաժանումները 3 նոր տանկ են խոցել:
Դեպքերի հետագա զարգացման մասին՝ մեր առաջիկա հաղորդագրություններում: