Արցախի բնակչությանը հումանիտար օգնություն են ուղարկել Երեւանից

«Բարի մամա» բարեգործական-հասարակական կազմակերպության ղեկավար Մարինա Ադուլյանը Լեռնային Ղարաբաղի սահմանամերձ գոտուց տեղահան եղած ժողովրդին եւ առաջին գիծ մեկնող ազատամարտիկներին անհրաժեշտ տաք հագուստ, սնունդ եւ դեղորայք հավաքելու նպատակով «Բարի մամա» հկ-ի ֆեյսբուքյան համանուն էջից դիմել էր բոլոր օգնել ցանկացողներին:

Մեկ օրվա մեջ բավական մեծ քանակի գումար, հագուստ եվ դեղորայք էր հավաքվել: Օգնության էր հասել նաեւ «Մեգաֆուդ» ընկերությունը՝ Լեռնային Ղարաբաղի ժողովրդի համար քաղցրավենիք ուղարկելով:

Այս բարի գործին մասնակցել են նաեւ մեր արտերկրում գտնվող հայրենակիցները՝ սնունդ եւ դեղորայք գնելու համար գումար փոխանցելով:

Ընդհանուր առմամբ հավաքվել էր 126.000 դրամ, որից 51 հազարով դեղորայք էր գնվել, իսկ մնացածով՝ սնունդ եւ գուլպաներ:

Նշենք նաեւ, որ այս ամբողջ սնունդն ու հագուստը կազմակերպության անդամներն հավաքել ու տեսակավորել էին Երեւանի «Ղարաբաղ կարպետ» խանութ-սրահում:

Մարինային իր օգնությունն էր առաջարկել ԼՂՀ պատերազմի մասնակից, հերոս, վերոհիշյալ խանութում աշխատող Սվետլանա Ագիյանը, ում ամուսինը նույնպես զինվորական է եւ ով անընդհատ կապի մեջ է Արցախի իր բարեկամների ու հարազատների հետ, եւ նրանցից էր ճշտել, թե տարհանված քաղաքացիներն ինչի կարիք ունեն:

Մեզ հետ զրույցում նաշ նշել էր, որ տարհանված բնակչությունը Ստեփանակերտում ամեն մեկն իր բարեկամների կամ ընկերների մոտ է հանգրվանել:

Սվետլանան 90-ականներին աշխատել է Ղարաբաղի հեռուստառադիոկոմիտետում, ռուսերենից եւ անգլերենից թարգմանություններ կատարել: Ինչպես նաեւ 1992թ-ին մասնակցել է Լեռնային Ղարաբաղի Գերագույն Խորհրդի առաջին նիստին՝ որպես թարգմանչուհի:

Նրա միջոցով արդեն հագուստը, սնունդն ու դեղորայքը մեքենայով տեղափոխել են Ստեփանակերտ:

Քրիստինա Տեր-Մաթեւոսյան