Տիգրան Ուրիխանյանն ԱԺ ամբիոնից հնչեցրեց Արցախում զոհված զինծառայողների անունները և շնորհակալություն հայտնեց նրանց

Ազգային ժողովի ԲՀԿ խմբակցության պատգամավոր Տիգրան Ուրիխանյանն Ազգային ժողովի ամբիոնից հնչեցրեց վերջին օրերին Արցախում Ադրբեջանի նախահարձակ գործողությունների արդյունքում զոհված զինծառայողների անունները և շնորհակալություն հայտնեց նրանց: Ազգային ժողովում հայտարարությունների ժամին Տիգրան Ուրիխանյանն ընդգծեց, որ ցանկանում էր խոսել Ադրբեջանի կողմից իրականացված ահաբեկչությունների, բռնությունների և ռազմական լայնածավալ հարձակումների սանձազերծման մասին: «Սակայն, հաշվի առնելով, որ վերջին ժամերին իրավիճակ է փոխվել և հույս կա, որ այլևս արյուն չի թափվելու, ես զերծ կմնամ այդ ամենից և ուղղակի ևս մեկ անգամ կհնչեցնեմ այն հերոսների անունները, ում շնորհիվ մեր հայրենիքը կանգուն է»,- ընդգծեց Ուրիխանյանը:

Նա հերթով հնչեցրեց Արցախում հակառակորդի նախահարձակ գործողությունների հետևանքով զոհված զինծառայողների անունները:«Շարքային Աղասի Ասատրյան, կրտսեր սերժանտ Վրեժ Սարգսյան, շարքային Հարություն Աբրահամյան, շարքային Քյարամ Սլոյան, մայոր Հայկ Թորոյան, ավագ լեյտենանտ Մերուժան Ստեփանյան, կրտսեր սերժանտ Ռուբեն Իսկանդարյան, կապիտան Արմենակ Ուրֆանյան, կապիտան Հովսեփ Կիրակոսյան, շարքային Նոդարիկ Մարգարյան, շարքային Սասուն Մկրտչյան, սերժանտ Յուրի Փարամազյան, մայոր Հովսեփ Մայիլյան ու ևս անուններ, որոնք դեռ չեն հրապարակվել: Փառք ձեզ, ձեր հիշատակը վառ լինի, Աստված պահապան ձեր ընտանիքներին: Շնորհակալություն ու խոնարհումս: Առողջություն եմ մաղթում բոլոր վիրավորներին: Շնորհակալություն եմ հայտնում նրանց, ում շնորհիվ երկիրս կանգուն է»,- եզրափակեց Ուրիխանյանը: