«Հեռախոսին պատասխանեց մի թուրք ու ասաց ինձ, որ ձեր զինվորն էլ չկա». անհետացած զինվորից հարզատներն այլ տեղեկություններ չունեն

Mamul.am-ը գրում է.

Ապրիլի 1-ից շփման գծում սկսված բախումների հետևանքով հայկական կողմն ունի 26 անհետ կորած: Անհետ կորածների շարքում է Արմավիրի մարզի Տարոնիկ գյուղի բնակիչ 19-ամյա Բորիս Օզմանյանը: Զինվորի հարզատներն արդեն երկու օր է որևէ տեղեկություն չունեն նրա մասին:  

Զինծառայողի հորեղբայր Վազիրը MAMUL.am-ի թղթակցի հետ զրույցում հաստատեց տեղեկությունը` մանրամասներ ներկայացնելով. «Ամսի 3-ի գիշերը մենք իմացել ենք, որ մեր զինվորը վիրավոր է, շտապել ենք Ղարաբաղ, բայց երբ զանգեցինք առողջական վիճակի մասին տեղեկություններ իմանալու, հեռախոսին պատասխանեց մի թուրք ու ասաց ինձ, որ ձեր զինվորն էլ չկա, սպանել ենք»,- ասաց հորեղբայրը` Վազիրը` հավելելով, որ այս պահին արդեն Բորիսի հեռախոսահամարը անհասանելի է: Վերջինը մեզ տեղեկացրեց, որ երեկ իրենք տեսանյութ էին նայում, որտեղ հորաքրոջը թվացել է, թե լսում է Բորիսի ձայնը: «Մեզ մոտ մի պահ հույս էր արթնացել, որ Բորիսին գտել ենք գերու կարգավիճակով, սակայն տեսանյութը ուշադիր դիտելուց հետո պարզվեց, որ նա չէ, ուղղակի ձայնը շատ նման էր: Դեռևս որևէ նորություն չունենք, անհամբեր սպասում ենք»,- ասաց Վազիրը:

Տղան վերջին անգամ իր Odnoklassniki.ru սոցիալական ցանցի էջ մուտք է գործել 2016 թվականի ապրիլի 1-ի ցերեկը:«Դու մի տխրի անուշ մամա, կյանքը այսպես չի մնա, նորից ամառ կգա զինվոր բալեդ տուն կգա»,- սա եղել է ժամկետային զինծառայող Բորիս Օզմանյանի վերջին հավանած գրառումը, որը նա արել է այս տարվա մարտի 13-ին: