Գյումրու Հայորդաց տան կողմից կազմակերպված նախաձեռնությանը վարակիչ թափով միանում են նաև մարզի շատ գյուղական համայնքներ

Գյումրիից Արցախ շարունակում են ուղղեւորվել պարեն ու  հագուստ տեղափոխող մեքենաները: Մայր Աթոռ Սուրբ Էջմիածնի Գյումրու Հայորդաց տան կողմից կազմակերպված նախաձեռնությանը  վարակիչ թափով միանում են ոչ միայն Գյումրիում, այլ նաև մարզի շատ գյուղական համայնքներ: Մարզի մի շարք համայնքների ց բացի, այս պահին օգնություն են բերում նաև Ջավախքից:  Նախաձեռնության մասին հայտարարելուց հետո մինչ օրս  չի դադարում ինչպես կազմակերպությունների,  դպրոցների, այնպես էլ անհատ քաղաքացիների հոսքը Հայորդաց տուն: Հագուստ, սնունդ, հիգիենայի պարագաներ, առաջին անհրաժեշտության դեղորայք՝ ամեն մարդ բերում է ինչ կարող է: Գյումրու Հայորդաց տնից արդեն 4-րդ մեքենան է հասել Արցախ, իսկ մեկը ճանապարհին է, բայց սա էլ վերջը չէ:

«Շշմած ու ապշած եմ այս ժողովրդի ոգևորության վրա, թե ինչ ջերմությամբ, ինչ հուզմունքով և ինչ մեծ սրտով են բերում այն ամենն, ինչ կարող են՝ սկսած 1 հացից, 2 տուփ ծխախոտից մինչև 1 տոննա ալյուր: Հավանաբար ի վերուստ էր տրված, որ այս նախաձեռնության հեղինակը լիներ  Հայորդաց տունը, ամենահուզիչը նախակրթարանի սաների ոգևորությունն է ու օգնելու փորձը»,-«Արմենպրես»-ի հետ զրույցի ժամանակ տեղեկացրեց Հայորդաց տան տնօրեն Աստղիկ Եդիգարյան-Բաբունցը:

Հայորդաց տան կողմից այս աշխատանքներն իրականացվում են Ստեփանակերտի շտաբի հետ համակարգված՝ հաշվի առնելով եղած պահանջը: «Մինչ այդ մոտ 370 արկղ գնացել է համակարգված՝  ամեն արկղի մեջ 5-6 հոգանոց ընտանիքի, կամ զինվորի  համար պահանջվող 2 շաբաթյա սնունդ, հագուստ, հիգիենայի պարագաներ: Նրանք, ովքեր ցանկություն են հայտնել գումար տալու մենք մերժել ենք ՝առաջարկելով այդ գումարը վերածել պարենի կամ հագուստ»,-հավելեց Աստղիկ Եդիգարյան-Բաբունցը:

Արմենուհի Մխոյան