Գանձակցի երիտասարդների նախաձեռնությամբ 3 բեռնատարներով օգնություն է ուղարկվել Արցախ

Ապրիլի 5-ից սկսած՝ Գեղարքունիքի մարզի Գանձակ գյուղի երիտասարդների նախաձեռնությամբ առաջնագծի մեր մարտիկներին աջակցելու նպատակով գյուղի կենտրոնում սկսեցին հավաքել գյուղմթերք, քաղցրավենիք, հյութեր, պահածոներ, ծխախոտ, հագուստ, ծածկոցներ, գուլպաներ:

Ինչպես տեղեկացրեց Գանձակի գյուղապետ Վանիկ Հարությունյանը, գրեթե անմիջապես Գանձակի երիտասարդների նախաձեռնությանը միացան նաև արտերկրում գտնվող համագյուղացիները` համայնք ուղարկելով ֆինանսական միջոցներ, իսկ գանձակցի աշակերտներն էլ բացիկներ էին փակցնում Արցախ ուղարկվող արկղերին՝ գրելով իրենց սրտի բարեմաղթանքները՝ ուղղված թշնամու գրոհող բանակի դեմ  կանգնած հայ զինվորներին: 

«Այս ամենից զատ, առանց վարանելու, ապրիլի 3-ին Գանձակ համայնքից երկրապահներին միացան եւ Արցախ մեկնեցին մի խումբ կամավորներ, ազատամարտիկներ: Համայնքի բազմաթիվ երիտասարդներ այսօր էլ ցուցակագրվել եւ սպասում են Արցախ մեկնելու իրենց հերթին: Ապրիլի 5-ի երեկոյան համայնքում նախաձեռնության արդյունքում հավաքված պարենը եւ մյուս իրերը կազմեցին 3 բեռնատար: Ավտոմեքենաները գիշերն ուղևորվեցին Ստեփանակերտ, և գանձակցիների օժանդակությունը հանձնվեց համապատասխան  կառույցներին»,-հավաստեց համայնքի ղեկավարը: Ցուցաբերած օգնության համար ԼՂՀ վարչապետ Արա Հարությունյանը գրավոր շնորհակալություն է հայտնել Գանձակի բնակչությանը:

Խոսրով Խլղաթյան