Աբրահամյան - Մեդվեդև հանդիպումն ավարտվեց. քննարկվել են տնտեսականից մինչև հումանիտար ոլորտներին առնչվող հարցեր

Հայաստանի և Ռուսաստանի կառավարությունների ղեկավարներ Հովիկ Աբրահամյանը և Դմիտրի Մեդվեդևը երկկողմ հանդիպմանը քննարկել են ինչպես հայ-ռուսական դաշնակցային համագործակ­ցությանը, այնպես էլ ԵԱՏՄ շրջանակներում ինտեգրացիոն փոխգործակցությանն առնչվող հարցեր՝ նախանշելով մոտ ապագայում երկկողմ գործընկերության հիմնական ուղղություններն ու խնդիրները: Այդ մասին հանդիպումից հետո հայտարարեց ՀՀ վարչապետը՝ ավելացնելով, որ հանդիպումն  անցել է շատ ջերմ և բարեկամական մթնոլորտում:

«Քննարկեցինք նաև երկուստեք հետաքրքրու­թյուն ներկայացնող համագործակցության այնպիսի ուղղություններին վերաբերող հարցերի լայն շրջանակ, ինչպիսիք են էկոնոմիկան, էներգետիկան, տրանսպորտը, գյուղատնտեսու­թյունը, զբոսաշրջությունը, հումանիտար համագործակցու­թյունը, կրթու­թյունը, մշակույթը, ինչպես նաև իրավապայմանագրային դաշտը, որն այսօր համալրվեց ստորագրված նոր փաստաթղթերով: Հատուկ ընդգծվեց հայ-ռուսական տնտեսական համագործակցության միջկառավարա­կան հանձնա­ժողովի գործունեության կարևորությունը և պարբերաբար հանդիպումների անհրաժեշտությունը, որը երկու երկրների առևտրատնտեսական հարաբերություն­ների փոխշահավետ զարգացման լավագույն միջոցներից մեկն է»,- «Արմենպրես»-ի հաղորդմամբ՝ ասաց ՀՀ վարչապետը՝ հավելելով, որ երկուստեք ընդգծվեց նաև Վերին Լարս սահմանային անցակետի անխափան գործունեության կարևորությունը:

Ամփոփելով խոսքը՝  Հովիկ Աբրահամյանը նշեց, որ բանակցություններն ընթացել են ինչպես միշտ փոխըմբռնման և կառուցողական մթնոլորտում: Վարչապետը վստահություն հայտնեց, որ ձեռք բերված պայմանավորվածությունները, որոնք ունեն անմիջական կիրառական նշանակություն, հաջողու­թյամբ կյանքի կկոչվեն: