Ադրբեջանը ոչ միայն չկարողացավ հաղթել, այլև շատ մոտ է դիվանագիտական ֆիասկոյի
ԲԼՈԳԼևոն Սարդարյանը ֆեյսբուքյան իր էջում գրում է.
Հասկանալի պատճառներով (որոնցից ամենաէականը, թերևս, առողջ բանականության առկայությունն է), ես չեմ կարծում, որ ճիշտ են նրանք, ովքեր պնդում են, թե հնգօրյա պատերազմում հայկական կողմը չի հաղթել: Չեմ ցանկանում անդրադառնալ ռազմական բաղադրիչին էն պարզ պատճառով, որ ի տարբերություն շատ-շատերի, ինձ ռազմական փորձագետ չեմ համարում, ամբողջական տեղեկատվության չեմ տիրապետում ու, հետևաբար, ի զորու չեմ հարյուր տոկոսանոց վստահությամբ պնդել, թե մերոնք կարող էին գրավել, ասենք, Գյանջան (զգացմունքային պոռթկման պահերին երբեմն ինքս էլ եմ նման կոչեր անում):
Բայց, միաժամանակ, գտնում եմ, որ Ադրբեջանը ոչ միայն չկարողացավ հաղթել, այլև շատ մոտ է դիվանագիտական ֆիասկոյի էն պարզ պատճառով, որ ստատուս-քվոն փոխելու նպատակով արված ռազմական ավանտյուրայի արդյունքում էապես փոխվեց միջազգային հանրության վերաբերմունքը թե՛ բուն հակամարտության, թե՛ այդ հակամարտությունը լայնամասշտաբ նոր պատերազմի տանող Ադրբեջանի նկատմամբ: Իմ բոլոր ընկերներն ու ծանոթները, որոնք հետևում են միջազգային մամուլի արձագանքներին (CNN, BBC, The Guardian, ռուսաստանյան մի շարք լրատվամիջոցներ) կարող են փաստել, որ չորս-հինգ օրվա ընթացքում էապես փոխվեցին Ղարաբաղյան հակամարտությանը վերաբերող շեշտադրումները և հիմնական թեզը դարձավ ազատ Արցախի ինքնորոշման իրավունքի իրականացումն ու այդ իրավունքի վրա բռնանալու՝ Ադրբեջանի փորձը:
Սա պաթոս չէ, քարոզ չէ, սա օբյեկտիվ ճշմարտություն է, ինչի վառ ապացույցը Ադրբեջանի ու ԼՂՀ արտգործնախարարներին միևնույն հարթության վրա դնելու CNN-ի արդեն բավական հայտնի դարձած «տրյուկն» էր: Հետևաբար, հիմա հենց էն պահն է, երբ Հայաստանի արտաքին քաղաքականության պատասխանատուները՝ օգտվելով և օգտագործելով Սփյուռքի մեր բոլոր կառույցների հնարավորություններից, պետք է ամեն ինչ անեն դիվանագիտական դաշտում հաստատված ստատուս-քվոն վերացնելու և կշեռքի նժարը դեպի հայկական կողմ թեքելու նպատակով: Քանի դեռ թնդանոթները լուռ են: