Սիրիական բանակը հետ է մղել ահաբեկիչների գրոհը Դումեյրի վրա

Սիրիական բանակը ապրիլի 7-ին խափանել է Դամասկոսից 35 կիլոմետր հեռավորության վրա գտնվող Դումեյր քաղաքի ռազմական օդանավակայանը գրավելու «Իսլամական պետություն» ահաբեկչական խմբավորման փորձերը: Ինչպես տեղեկացնում է «Արմենպրես»-ը, հղում անելով «Ալ Ալյամ» հեռուստաալիքին, ահաբեկիչների գրոհին աջակցել են ելուզակային այլ խմբավորումների անդամներ, որոնք նրանց կողմն են անցել՝ խախտելով հրադադարի ռեժիմը:

Զինյալները գրոհել են նաեւ «Տիշրին» ջերմաէլեկտրակենտրոնը, սակայն զինծառայողներին եւ աշխարհազորայիններին հաջողվել է պաշտպանել Սիրիայի տնտեսության համար կարեւոր այդ օբյեկտը: Ռազմաճակատի առանձին հատվածներում մարտական բախումները դեռեւս շարունակվում են:

Անակնկալ է դարձել ահաբեկիչների կողմից Դումեյրից հյուսիս գտնվող ցեմենտի գործարանի 340 աշխատողների պատանդառումը: Նրանցից մոտավորապես 200-ը մնում են գերության մեջ, նրանց ճակատագիրն անհայտ է: Ըստ որոշ տվյալների՝ պատանդները փակված են ձեռնարկության տարածքում, ըստ այլ տվյալների՝ գերյալներին տարել են Թել Դակվա լեռնային շրջան, որտեղ գտնվում է ԻՊ-ի հենակետը: 140 պատանդներ կարողացել են դուրս պրծնել արմատականների ձեռքից եւ թաքնվել հարեւան Ջեյրուդի բնակիչների մոտ:

Դումեյրը գտնվում է Դամասկոս-Բաղդադ խճուղու վրա Ադրա ազատ արդյունաբերական գոտու հարեւանությամբ: 2013 թվականի դեկտեմբերին ահաբեկիչներն այնտեղ հաշվեհարդար էին սարքել Ադրա էլ Ումալիա բանվորական ավանում: Դրա զոհ էր դարձել ավելի քան 100 մարդ, հաղորդել է ՏԱՍՍ-ը: