Գլխատված Քյարամ Սլոյանի հայրը 2 օրից Արցախ է մեկնելու

Panorama.am-ը գրում է.

Ադրբեջանցի բարբարոսների կողմից գլխատված 20-ամյա զինվորի՝  Քյարամ Սլոյանի հայրը  պատրաստվում է մի քանի օրից Արցախ մեկնել: Ազգությամբ եզդի բազմազավակ հոր հետ Ղարաբաղ են մեկնելու նաև համագյուղացիներն ու գյուղապետը:

Այս մասին Panorama.am-ին պատմեց Արտաշավանի գյուղապետ Ղազար Կարապետյանը: Դաշնակցական գյուղապետը 1989-1994 թվականներին ևս  մասնակցել է Ղարաբաղյան պատերազմին:

«Սլոյանի հայրն էլ կռված տղա է: Սպասում ենք երեխու յոթը տանք: Կիրակի յոթը կտանք, նոր կգնանք»,-ասաց Ղազար Կարապետյանը:

Ադրբեջանական կողմի սանձազերծած ռազմական գործողությունների հենց առաջին օրերին գյուղից 15 տղամարդ մեկնել է Լեռնային Ղարաբաղի Հանրապետություն:

«Մենք մնացել ենք գյուղում, ասեցինք՝ տղուն (ի նկատի ունի Քյարամի հորը՝ Քալային) մենակ չթողնենք»,-ասաց գյուղապետը:

Տեղում մնացածներն անընդհատ կապի մեջ են մեկնածների հետ. «Նոր էլ զանգեցինք: Ասում են՝ հանգիստ է: Մենք  կգնանք իրենց մոտ»:

Գյուղապետի խոսքով, Սլոյանների բազմազավակ ընտանիքը սոցիալապես վատ պայմաններում է ապրում. «Տուն չկա, տեղ չկա: Պետք է տեսնել պայմանները»:

Մարզպետարանից ասել են կօգնեն հերոսի շիրմաքարը կանգնեցնելու հարցում:

Արցախից նոր վերադարձած եզդիական համայնքի հոգևոր առաջնորդ Բրո Հասանյանն այսօր լրագրողներին մանրամասներ էր պատմել զինվորի դաժան սպանությունից. «Քյարամ Սլոյանը զոհվել է իր հրամանատարի համար: Հրամանատարը վիրավորվել է, Քյարամը հետ է դարձել նրան գրկել, և այդ ժամանակ թուրքը բռնել է նրա ծոծրակից»:

Քյարամի հայրն ավելի վաղ հայտարարել էր, որ մյուս երեխաներին էլ բանակ կուղարկի. «Ես էլ իրենց հետ պիտի ծառայեմ»:

Եղբոր որդու վրեժը հանելու համար հորեղբայրը ևս Արցախ է մեկնել: