Բողոքի ցույց՝ ընդդեմ Ղարաբաղյան դեպքերին միջազգային դիվանագիտության արձագանքի

Այսօր՝ ապրիլի 9-ին, ժամը 15:00-ին, Հանրապետության հրապարակում տեղի կունենա բողոքի ակցիա՝ ընդդեմ Ղարաբաղյան դեպքերին միջազգային դիվանագիտության արձագանքի: Նախաձեռնող խմբի հայտարարության տեքստը ներկայացնում ենք ստորև.

«Սույն թվականի ապրիլի 2-ին ԼՂՀ սահմանի ողջ երկայնքով Ադրբեջանի կողմից սանձազերծված քառօրյա պատերազմը և դրան հաջորդած փխրուն զինադադարը մինչ այս պահը որևէ հստակություն չի մտցրել հակամարտության կարգավորման տեսլականի մեջ։ Ռազմական գործողությունների ընթացքում նկատվեց միջազգային հանրության և հատկապես հակամարտության կարգավորման գործում առաջնային ներգրավվածություն ունեցող կառույցների և երկրների մի մասի հանցավոր լռությունը կամ ոչ պակաս հանցավոր հավասարության նշան դնելը ՀՀ, ԼՂՀ և Ադրբեջանական կողմի գործողությունների մեջ։

Այս կապակցությամբ մի խումբ ՀՀ քաղաքացիներ, որոնք այս օրերին զբաղված են տեղեկատվական հոսքերի և հակառակորդի պրոպագանդայի դեմ աշխատանքների կազմակերպմամբ, նկատելով հայկական համացանցում տիրող տրամադրությունները, որոշեցին նախաձեռնել բողոքի ցույց ընդդեմ հակամարտության լուծման գործընթացում ներգրավված պետությունների, միջազգային կառույցների և թույլ դիվանագիտության։ Ֆեյսբուք սոցիալական ցանցում միջոցառման հայտարարման պահից սկսած, գրանցվեց մեծ ակտիվություն և հոսքը դեռ շարունակվում է։ Ապրիլի 8-ի երեկոյի դրությամբ մասնակցության ցանկություն հայտնածների թիվը հասնում է 4000-ի, իսկ հրավիրվածներինը՝ գրեթե 30 000-ի։

Ցույցը համընկնում է ԵԱՀԿ Մինսկի խմբի համանախագահների Երևան կատարելիք այցի հետ, սակայն սույն միջոցառումը միայն Մինսկի խմբի համանախագահներին չի վերաբերվում, այլ նաև Ռուսաստանին, ԱՄՆ-ին, Ֆրանսիային, Իսրայելին, ՀԱՊԿ-ին, ԵԱՏՄ-ին, ԵԽԽՎ-ին, Եվրախորհրդին, ԵԱՀԿ կառույցներին և այլ երկրներին։