Պետերբուրգի Բորիս Էյֆմանի թատրոնը «Աննա Կարենինա» բալետը կցուցադրի Հայաստանում

 Բորիս Էյֆմանի բալետի ակադեմիական թատրոնը «Աննա Կարենինա» ներկայացմամբ ապրիլի 11-ին անդրկովկասյան շրջագայություն է սկսում: Ինչպես տեղեկացնում է «Արմենպրես»-ը, պետեբուրգցիների հյուրախաղերը ապրիլի 12-ից մինչեւ 16-ը տեղի կունենան Երեւանում եւ Թբիլիսիում:

«Մեր թատերախումբը զրկված չի եղել հանրության սիրուց, այդուամենայնիվ, մենք առանձնակի ջերմությամբ ենք հիշում այն ֆանտաստիկ ընդունելությունը, որին երկուսուկես տարի առաջ մեզ արժանացրին Հայաստանի եւ Վրաստանի հանդիսականները»,- ուղեւորությունից առաջ ՏԱՍՍ-ին ասել է Բորիս Էյֆմանը:

«Պարը, հիրավի, հոգեւոր շփման եզակի միջոց է, որը միշտ Էլ մարդկանց օգնում է փոխըմբռնման հասնել: Մենք հաճույքով ենք վերադառնում Երեւան եւ Թբիլիսի՝ «Աննա Կարենինայով», որը ներկայացնում Է Ռուսաստանի ժամանակակից բալետային արվեստը եւ առավել ամբողջականորեն Է բացահայտում մեր թատրոնի գեղագիտական անհատականությունը»,- ընդգծել է Էյֆմանը:

Նա նշել է, որ երեւանյան ներկայացումները կդառնան Հայաստանում Ռուսաստանի օրերի բաղկացուցիչ մասը, որոնք անցկացվում են ԱՊՀ-ի 25-ամյակի տոնակատարության շրջանակներում: Պետերբուրգցիներին տրամադրված է Ալեքսանդր Սպենդիարյանի անվան օպերայի եւ բալետի պետական ակադեմիական թատրոնի բեմը:

«Աննա Կարենինա» բալետը բեմադրվել է 2005 թվականին Պյոտր Չայկովսկու երաժշտության հիման վրա: Արդեն տասը տարվա ընթացքում բալետը ցուցադրվել է Ռուսաստանի տարբեր քաղաքներում, հյուրախաղերի ընթացքում ներկայացվել ԱՄՆ-ում, Կանադայում, Ավստրալիայում, Մեծ Բրիտանիայում, Գերմանիայում, Հոլանդիայում, Իսպանիայում, Ֆրանսիայում, Չինաստանում:

Լուսանկարը` ТАСС