Անհասցե հայտարարությունները Արդբեջանին թույլ կտան շարունակել սադրիչ գործողությունները. Մանվել Ղումաշյան

Ադրբեջանի ագրեսիան կասեցնելու համար նախ անհրաժեշտ է շփման գծում ներդնել մոնիտորինգի մեխանիզմներ: Եթե կոնկրետ գործողություններ չլինեն, և հնչեն միայն անհասցե հայտարարություններ, ապա Արդբեջանը շարունակելու է սադրիչ գործողությունները:

Այս մասին «Արմենպրես»-ի հետ զրույցում նշեց «Եվրոպական ինտեգրացիա»հասարակական կազմակերպության քաղաքական հարցերով փորձագետՄանվել Ղումաշյանը:

«Եթե միջազգային հանրությունը փորձի լուրջ զբաղվել խնդրով, ապա ղարաբաղա-ադրբեջանական շփման գծում մոնիտորինգի մեխանիզմներ պետք է ներդնի, դա  անհրաժեշտություն է: Դա հնարավորություն կտա հստակ պարզել, թե որ կողմն է խախտել հրադադարի ռեժիմը: Այդ դեպքում, բնականաբար, համանախագահներն անհասցե հայտարարություններ չեն անի, հստակ կերևա, թե ով է խախտել հրադադարի ռեժիմը և համապատասխան պատժամիջոցներ կկիրառվեն նրա նկատմամբ»,-ասաց փորձագետը: Նրա խոսքով, եթե դա չկա, ապա խնդրի լուծում չի լինի, որովհետև Բաքուն, իր ներքին խնդիրներից ելնելո վ, ժամանակ առ ժամանակ կգնա այս քայլին:

«Քանի դեռ խնդիրը լուծված չէ, Ադրբեջանը, տեսնելով, որ աշխարհի հզորները զբաղված են այլ հարցերով, ժամանակ առ ժամանակ շփման գծում կրկին սադրելու է իրավիճակը: Այդ երկիրն ունի տնտեսական ճգնաժամ, նավթի գների անկում, հետևաբար ինչ-որ ձևով փորձելու է ժողովորդի ուշադրությունը շեղել, ցույց տալ, որ նավթից ստացվող գումարները գնում են ղարաբաղան խնդիրը ռազմական ճանապարհով լուծելու գործին»,-ասաց Մանվել Ղումաշյանը:

Անդրադառնալով ԵԱՀԿ Մինսկի խմբի համանախագահների հայտարարությանը՝ նա նշեց, որ, ըստ էության, որևէ նոր բան չկա: Ընդհանուր առմամբ, նույն շեշտադրմամբ հայտարարություններն են: Եվ այս փուլում նրանցից ավելին սպասել պետք էլ չէր:

«Իրավիճակն առանց այն էլ թեժ է, նրանց համար թիվ մեկ խնդիրը հավասարակշռությունը պահելն է, որպեսզի չվնասվի առանց այն էլ փխրուն գործընթացը: Ի վերջո, քաղաքականությունը միայն այն չէ, ինչ ջրի երեսին երևում է: Ռուս-թուրքական հարաբերությունների սրմամբ, Սիրիայում իրավիճակի լարվածությամբ պայմանավորված որևէ կողմին ձեռնտու չէ ղարաբաղյան խնդրի թեժացումը: Չորսօրյա պատերազմն ավարտվեց առաջին հերթին մեր զինվորների, մեր բանակի ջանքով, բայց միջազգային հանրության միջամտությունն էլ կար»,-ավելացրեց Մանվել Ղումաշյանը;

Ինչ վերաբերում է պաշտոնական Մոսկվայի դիրքորոշմանը, ապա Մանվել Ղումաշյանը նշեց, որ դա բացատրվում է հետևյալ կերպ` Ռուսաստանը ցանկանում է իր կողմում պահել թե Հայաստանին, թե Ադրբեջանին:

«Այստեղ մեր դիվանագիտությունը լուրջ անելիք ունի: Պատերազմից հետո պետք է խնդրին լուրջ վերաբերել և Ռուսաստանին հետևողականորեն ասել, որ մենք վերջ ի վերջո ռազմավարական գործընկերներ ենք: Հարց բարձրացնել, որ եթե ռազմավարական գործընկերներ ենք, ապա որտե՞ղ է դա երևում: Օրինակ, Թուրքիան Ադրբեջանի ռազմավարական գործընկերն է, և դա պարզ երևում է: Ռուսաստանին պետք է դա անընդհատ ասվի: Ամեն դեպքում հայկական կողմի  վերջին հայտարարություններում այդ միտումը երևում է»,-հավելեց փորձագետը: