Որոշիչ դիմակայություն Մադրիդում և Մանչեսթերում

 «Չեմպիոնների լիգա»-ի ընթացիկ մրցաշրջանի 1/4 եզափակիչ փուլի պատասխան հանդիպումների առաջին խաղային օրը խոստանում է հետաքրքիր ու լարված լինել: «Արմենպրես»-ը հայտնում է, որ ապրիլի 12-ին Մադրիդում տեղի «Ռեալ»-ը «Վոլֆսբուրգ»-ի դեմ խաղում ստիպված է վերականգնել Գերմանիայում սասանված հեղինակությունը, ի սկ Մանչեսթերում «Սիթի»-ն կփորձի սեփական երկրպագուներին պատմական անակնկալ մատուցել և գրեթե լիովին տապալված մրցաշրջանը փրկել՝ դուրս գալով կիսաեզրափակիչ փուլ:

Ավելի քան 80 000 հանդիսական տեղավորող Մադրիդի «Սանտյագո Բեռնաբեու» մարզադաշտը «Ռեալ»-«Վոլֆսբուրգ» դիմակայության ամենաորոշիչ գործոններից մեկը կլինի: «Ռեալ»-ի՝ Գերմանիայում կրած 0-2 հաշվով անակնկալ պարտությունը հավելյալ խնդիրներ է ստեղծել Զինեդին Զիդանի թիմի համար, որը կիսաեզրափակիչ դուրս գալու համար մրցակցի դարպասը պետք է գրավի 3 և ավելի անգամ:

Առաջին խաղին վնասվածքի պատճառով միայն 40 րոպեով մասնակցած Քարիմ Բենզեման արդեն իսկ միացել է «Ռեալ»-ի թիմային մարզմանը: Վնասվածքից ապաքինվել է նաև «Ռեալ»-ի կենտրոնական պաշտպան Ռաֆայել Վարանը, ով չի խաղացել վերջին հանդիպումներում:

«Վոլֆսբուրգ»-ն իր հերթին Մադրիդում կփորձի պատմական սխրանք գործել: Պատահական չէ, որ «Վոլֆսբուրգ»-ի խաղացող Անդրե Շյուռլեն հայտարարել է, թե «Ռեալ»-ի դեմ խաղն իրենց միակ հնարավորությունն է ինչ-որ կերպ հիշարժան դարձնելու անկայուն մրցաշրջանը:

Սպասվում է, որ «Սանտյագո Բեռնաբեու» մարզադաշտում կայանալիք խաղին «Ռեալ»-ը դաշտ դուրս կբերի իր հարձակողական ողջ պոտենցիալը՝ Բենզեմա - Գարեթ Բեյլ - Քրիշտիանու Ռոնալդու, որին խորքից կփորեն օգնել Թոնի Կրոսը, Լուկա Մոդրիչը: Արդյոք Կազեմիրոն կխաղա՞ «Ռեալ»-ի հիմնական կազմում, դժվար է ասել, քանի որ վերջինս ավելի շատ միտված է պաշտպանության:

Իրականում շատ ավելի բարդ է գուշակել, թե ինչպիսի մարտավարությամբ խաղադաշտ դուրս կգա «Վոլֆսբուրգ»-ը: Եթե գերմանական թիմի մարզչական շտաբը պաշտպանական մարտավարություն կիրառի, ապա թիմը կխաղա 5-3-1 մարտավարությամբ, որն ամենևին էլ հուսալի չէ «Վոլֆսբուրգ»-ի համար: Բացի այդ գերմանական ակումբի որակյալ հատկանիշներից մեկը հենց հարձակողական ներուժն է: Այնուամենայնիվ, դժվար է ակնկալել, որ ստեղծագործ Յուլիան Դրաքսլերն ու Շյուռլեն միմիայն հաձակողական գործողություններով զբաղվեն:

«Մանչեսթեր Սիթի»-«ՊՍԺ» հանդիպումը ևս բավականին հետաքրքիր ու դրամատիկ պայքար է խոստանում, քանի որ Ֆրանսիայի մայրաքաղաքում գրանցված գոլառատ ոչ-ոքի՝ 2-2 հաշիվը մի շարք հարցեր անորոշ է թողել: Դեռևս մարտին Ֆրանսիայի ընթացիկ առաջնության չեմպիոն հռչակված «ՊՍԺ»-ն ստիպված կլինի մտածել գոլ հեղինակելու մասին, քանի որ գոլազուրկ ոչ-ոքի արդյունքի դեպքում Լորան Բլանի թիմը ստիպված կլինի բացատրություն տալ Զլատան Իբրահիմովիչին ու արաբ շեյխերին, թե ինչու հնարավոր չեղավ հաղթահարել անգլիական ակումբի արգելքը:

«Սիթի»-ն իր հերթին մեծ ցանկություն ունի պատվով ճանապարհ դնելու գլխավոր մարզիչ Մանուել Պելեգրինիին, ում փոխարեն ընթացիկ մրցաշրջանի ավարտից հետո «Սիթի»-ի մարզչական ղեկը կստանձնի Խոսեպ Գվարդիոլան: Անգլիական «Պրեմիեր լիգա»-ում չեմպիոնության մասին գրեթե մոռացած «Սիթի»-ն հույս ունի սեփական երկրպագուներին սփոփելու «Չեմպիոնների լիգա»-ում հնարավորինս առաջ գնալու միջոցով: Մրցաշրջանն իսկապես տապալված կհամարվի, եթե «Սիթի»-ն չօգտագործի այն առավելությունը, որին հասել է Փարիզում՝ 2 գնդակ ուղարկելով «ՊՍԺ»- ի դարպասը:

Թե՛ «Սիթի»-ն, թե՛ «ՊՍԺ»-ն կարող են որոշակի կադրային խնդիրներ ունենալ, սակայն 2 թիմերում էլ կան արժանի փոխարինողներ: Կատարողների պակաս, կարծես թե, չի լինի այս խաղում, սակայն շատ բան կախված կլինի ոչ միայն անհատներից, այլև թիմային գործողություններից: Ինչևէ, «Էթիհադ»-ում սպասվող մրցավեճը խոստանում է լարված լինել մինչև մրցավարի սուլիչը կազդարարի, թե ի վերջո ով հաղթեց ու կշարունակի պայքարը «Չեմպիոնների լիգա»-ի կիսաեզրափակիչ փուլում:

«Ռեալ»-«Վոլֆսբուրգ» և «Սիթի»-«ՊՍԺ» հանդիպումները կսկսվեն Երևանի ժամանակով 22:45-ին: