Գավառի պետական համալսարանն աջակցում է Մարտակերտի ավերածությունների վերականգնմանը

Գավառի պետական համալսարանի ուսանողները, շրջանավարտները, դասախոսներն ու աշխատակազմն անմասն չեն մնացելԱրցախում, Հայաստանում եւ Սփյուռքում սկիզբ առած հզոր հայրենասիրական շարժումից, որի նպատակն է` աջակցել Արցախի սահմանները պաշտպանող քաջարի հայորդիներին, մասնակցել թշնամու կողմից ռմբակոծված խաղաղ բնակավայրերի վերականգնմանը:

Ինչպես տեղեկացրին  Գավառի պետական համալսարանի հասարակայնության  հետ կապերի  եւ լրատվության բաժնից, համալսարանի   ուսանողական խորհուրդը կազմակերպել է «Զորավիգ լինենք հայ զինվորին» ակցիա, որի շրջանակներում հավաքագրված անհրաժեշտ պարագաներն ուղարկվել են Արցախ, իսկ հանգանակված 150.000 ՀՀ դրամը փոխանցվել է Արցախի օգնության հիմնադրամին:

Գավառի պետական համալսարանի ուսանողական խորհրդի նախագահ Արեգ Սինանյանը տեղեկացրեց, որ ուսանողների պատրաստած ծանրոցներն Արցախ է հասցրել ԳՊՀ հեռակա ուսուցման ֆակուլտետի ուսանող Խաչիկ Գեւորգյանը, ով հայրենիքի սահմանները պաշտպանողների շարքերը համալրել է որպես կամավոր:

«Ծանրոցները ներառում են սննդամթերք, տաք հագուստ, առաջին անհրաժեշտության իրեր, հիգիենայի պարագաներ: Արկղերում նաեւ ուսանողների նամակներն են՝ հասցեագրված հայրենյաց պաշտպաններին՝ թաթախված սիրո, հավատի, անսահման երախտագիտության զգացումներով, լի աղոթքի եւ օրհնանքի խոսքերով, խաղաղ երկնքի ներքո ապրելու եւ արարելու մաղթանքներով»,-նշեց Արեգ Սինանյանը:

 Պատերազմական գործողությունների ընթացքում Մարտակերտ քաղաքին պատճառված ավերածությունների  վերականգնմանը  աջակցելու համար Գավառի պետական համալսարանի ռեկտորատը, բանակցելով Մարտակերտի քաղաքապետ Միշա Գյուրջյանի հետ, բուհի նպատակների համար ձեռք բերված երկու հարյուր հիսուն քառակուսի մետր ապակին սիրով տրամադրեց Մարտակերտ քաղաքի դպրոցին։

Ապակիները կօգտագործվեն ինչպես Մարտակերտի դպրոցի, այնպես էլ բնակելի տների կոտրված պատուհանները վերանորոգելու նպատակով:

«Հայաստանի Հանրապետության մայրաքաղաքում, ԵԱՀԿ Մինսկի խմբի համանախագահների հետ համազգային մտահոգության խնդրի շուրջ քննարկումների ընթացքում ՀՀ արտաքին գործերի նախարարության մուտքի առջեւ տեղի ունեցած

բողոքի ակցիային մասնակցեցին նաեւ Գավառի պետական համալսարանի բազմաթիվ ուսանողներ եւ  աշխատակիցներ: Մեկ րոպե լռությամբ ցույցի մասնակիցները հարգանքի տուրք մատուցեցին ադրբեջանական ագրեսիային դիմակայելիս  զոհված հերոս հայորդիների հիշատակին»,-տեղեկացրին Գավառի պետական համալսարանի լրատվության եւ հասարակայնության հետ կապերի բաժնից:

Խոսրով Խլղաթյան