ՄԱԿ-ի «Դպրոցական սնունդ» ազգային ծրագրով մոտ 84 500 աշակերտի սնունդ է տրամադրվել

ՀՀ կառավարությունը Պարենի համաշխարհային ծրագրի (ՊՀԾ), Համաշխարհային բանկի և «Գործընկերություն հանուն երեխաների զարգացման» կազմակերպության աջակցությամբ ապրիլի 8-ին և 9-ին իրականացրեց «Համակարգային մոտեցում կրթության արդյունքների բարելավմանը» (ՀՄԿԱԲ) խորագրով երկօրյա աշխատաժողով Ծաղկաձորում: Կառավարության գծային նախարարությունների`այդ թվում կենտրոնական և տեղական մակարդակների, միջազգային և պ ետական կառույցների շուրջ 70 մասնագետ և ներկայացուցիչ միասին աշխատեցին 2010 թվականից ՊՀԾ-ի աջակցությամբ Հայաստանում իրականացվող «Դպրոցական սնունդ» ազգային ծրագրի թույլ և ուժեղ կողմերի վերհանման ուղղությամբ: Այս մասին  տեղեկացրին ՄԱԿ-ի հայաստանյան գրասենյակից:

Աշխատաժողովի հիմնական նպատակն էր, համաձայն մշակված մեթոդաբանության, գնահատել և վերլուծել խմբային աշխատանքի արդյունքները, որով և օժանդակել ՀՀ կառավարությանը և գործընկեր կազմակերպություններին կրթության և սոցիալական պաշտպանության քաղաքականությունների և ծրագրերի հետագա մշակման հարցում: 

 Բացելով աշխատաժողովը ՀՀ կրթության և գիտության նախարարության (ՀՀ ԿԳՆ) աշխատակազմի ղեկավար Նաիրի Հարությունյանը ներկայացրեց ԿԳՆ նախարար Լևոն Մկրտչյանի ուղերձը, որով նա իր երախտիքի խոսքն էր հայտնում ՊՀԾ-ին, Համաշխարհային բանկին, «Գործընկերություն հանուն երեխաների զարգացման» կազմակերպությանը և այլ կառավարական ու ոչ կառավարական կազմակերպություններին նման աշխատաժողովի նախաձեռնման ու մասնակցության համար: «Սա, անշուշտ, կընդլայնի Հայաստանի կառավարության կողմից ՊՀԾ-ի աջակցությամբ վերջին 5 տարիների ընթացքում իրականացվող « Դպրոցական սնունդ» ծրագրի ռազմավարության զարգացման գործընթացը», - նշեց պրն. Հարությունյանը: Նա նաև հավելեց. «Ազգային ծրագրի շրջանակներում սնունդ է տրամադրվել տարրական դասարանների շուրջ 84 500 աշակերտի, իսկ դպրոցները համալրվել են դպրոցական սննդի կազմակերպման խոհանոցային ժամանակակից սարքավորումներով ու պարագաներով»: Նա հույս հայտնեց, որ «Դպրոցական սնունդ» ազգային ծրագիրը, որը կազմում է 2015-2020թթ. կրթական բարեփոխումների ռազմավարության անքակտելի մասը, կընդլայնվի՝ 2025 թվականին ընդգրկելով հանրապետության ամբողջ տարածքը:

 ՊՀԾ հայաստանյան գրասենյակի ներկայացուցիչ Պասկալ Միշոն իր բացման խոսքում նշեց. «Կրթության բարելավումը պահանջում է ավելին, քան պարզապես ռեսուրսների ավելացում: Ըստ Պարենային ապահովության, խոցելիության և սնուցման համապարփակ վերլուծության վերջին արդյունքների Հայաստանում առավել կարիքավոր և խոցելի իրավիճակում գտնվող մարդկանց շրջանում արձանագրվել է խիստ մտահոգիչ իրավիճակ և կոչ է արվել կատարել լրացուցիչ ներդրումներ սոցիալական պաշտպանության ոլորտում` հանուն սովի և թերսնման դեմ պայքարի: Նա նաև ընդգծեց, որ Հայաստանում «Դպրոցակա ն սնունդ» ծրագիրն ունի  սոցիալական ապահովության ուժեղ համակարգ ստեղծելու ներուժ և, ակնհայտորեն, այն նշանակալից ներդրում է՝ ուղղված երկրում պարենային անապահովության և թերսնման ոլորտի խնդիրների արդյունավետ լուծմանը: Այն նաև խթանում է կրթության, սնուցման, գյուղատնտեսության և տնտեսական զարգացման միջև համագործակցությունը գյուղական համայնքներում`զորացնելով կանանց դերը այդ ամբողջ գործընթացում: «ՀՄԿԱԲ աշխատաժողովից ակնկալվող արդյունքները կօգնեն մեզ բացահայտել կրթության բնագավառում տարվող քաղաքականությունների ուժեղ կողմերն ու բացթողումները և մշակել բարելավմանն ուղղված գործողությունների ծրագիր»:

«Գործընկերություն հանուն երեխաների զարգացման» կազմակերպության ավագ խորհրդատու Բաշիր Սարրը նշեց, որ դպրոցական սննդի ապահովումը ոչ միայն օգնում է լուծել սննդի ապահովման հետ կապված հարցերը, այլև նպաստում է աղքատության կրճատմանը, այս առումով, օժանդակելով նաև Կայուն զարգացման նպատակների իրագործմանը: