Մտածել էի, որ եթե տղա ծնվի, մեր ազգի հերոսներից մեկի անունը կդնեմ. Գյումրիում նորածնին կոչել են Արցախում զոհված զինծառայողի անունով

Shabat.am-ը գրում է.

Այս օրերին Հայաստանի բոլոր մայրերը ամեն րոպե լուրի են սպասում սահմանից: Ու կապ չունի, թե ում որդին է բանակում, նրանք բոլորը մերն են ու հայրենիքն էլ աղոթում է մոր պես իր յուրաքանչյուր զինվորի համար:

Մեր հայրենիքի մի անկյունում էլ մի մայր լույս աշխարհ է բերում մի ապագա զինվորի: Գյումրու ծննդատանը ապրիլի 10-ին լույս աշխարհ եկած արու զավակին ծնողները կոչել են Տիգրան՝ ի պատիվ Ջեբրայիլում զոհված քաջ նահատակի:

Նորածին Տիգրանի ծնողները Շիրակի մարզի Քեթի գյուղից են: Տիգրանը Խաչատրյանների ընտանիքում երրորդ զավակն է: Փոքրիկն իր անունը ստացել ի պատիվ 20-ամյա Տիգրանի, ով անակնկալի գալով թշնամու հարձակումից՝ մղվել է առաջնագիծ, մտել թշնամու 8 տանկի մեջ, «անողոք, անզիջում կռիվ է մղել» իր մի տանկով կարողացել է ոչնչացնել թշնամու 3 տանկ ու նահատակվել:

Երեխայի անվան ընտրությունը կայացրել է հայրը՝ Ռոման Խաչատրյանը, ով Shabat.am-ի հետ զրույցում պատմեց, որ իրենք նախօրոք չեն իմացել երեխայի սեռի մասին:

«Բայց ես մտածել էի, որ եթե տղա ծնվի, մեր ազգային հերոսներից մեկի անունը պետք է դնեմ: Գյումրիի մեր հերոսի՝ Տիգրանի պատմությունից հետո որոշեցի երեխայիս անունը իր պատվին Տիգրան դնել»,-նշեց երեխայի հայրը:

Խաչատրյանները հերոսին չեն ճանաչել, պարզապես լսել են նրա հերոսության մասին ու մեծ սրտի մեծ ու անկեղծ ցանկությամբ որոշել շարունակել հերոսի անունը: Նորաթուխ, բայցև փորձառու հայրիկի միակ երազանքն այն է, որ որդին ապագայում ազգին պիտանի մարդ դառնա, նրանով հպարտանան: 

«Ցանկանում եմ,որ բոլորի ընտանիքներում լինի այդ ուրախությունը»,-ասաց Ռոման Խաչատրյանը: