Վերնիսաժը փոփոխության կենթարկեն

Երեւանի քաղաքապետի տեղակալ Դավիթ Օհանյանը Գլխավոր պողոտայի «Վերնիսաժ» հատվածի վերակառուցման, արդիականացման, կանոնակարգման եւ բարեկարգման նախագծի իրագործման նպատակով Երեւանի քաղաքապետարանում հանդիպում-քննարկում է անցկացրել տարածքում առեւտրային գործունեություն իրականացնող անձանց հետ:

Ինչպես հաղորդում են քաղաքապետարանի տեղեկատվության եւ հասարակայնության հետ կապերի բաժնից՝ քննարկմանը մասնակցել են նաեւ Երեւանի գլխավոր ճարտարապետ Տիգրան Բարսեղյանն ու «Երեւաննախագիծ» ինստիտուտի տնօրեն Սիրեկան Օհանյանը: Հանդիպման ընթացքում ներկայացվել են բարեկարգման ծրագրի էսքիզային չորս տարբերակներ:

Ծրագրով նախատեսվում է տարածքի միջնամասում գտնվող, ներկայումս չգործող շատրվանների փոխարեն ստեղծել նոր ճեմուղի, որի կողքերով էլ կկազմակերպվի վերնիսաժը: Տարածքը նաեւ կկահավորվի նստարաններով: Երկու կողմերից մուտքերն էլ կառանձնանան ջրային ավազաններով, ամբողջ հատվածը կբարեկարգվի եւ կկանաչապատվի:

Երեւանի քաղաքապետի տեղակալ Դավիթ Օհանյանը նշել է, որ տարածքի բարեկարգումն ու արդիականացումը մայրաքաղաքի համար սպասված ծրագիր է, որի արդյունքում Երեւանի կենտրոնում կձևավորվի հանգստի գոտի, որը միաժամանակ կլինի նաեւ միանգամայն նոր մոտեցումներով բացօթյա ցուցասրահ եւ առեւտրային տարածք:

«Ավելի քան քսան տարի առաջ ինքնաբուխ ձեւավորված «Վերնիսաժը» տարիների ընթացքում մասնակիորեն փոփոխվել է, սակայն այդքանով հանդերձ՝ այսօր այն մայրաքաղաքի կենտրոնին հարիր չէ: «Վերնիսաժի» տարածքը Նալբանդյան-Հանրապետություն փողոցների միջանկյալ հատվածում գտնվող, արդեն իսկ բարեկարգված խաչքարերի պուրակի շարունակությունն է, որն այսօր, ցավոք, ամենեւին էլ այդպիսին չէ: Երեւանի քաղաքապետարանը բազմիցս շեշտել է, որ անելու է հնարավորը՝ մայրաքաղաքի բնակիչներին վերադարձնելու երբեմնի բարեկարգ հանգստի գոտիները»,- նշել է Դավիթ Օհանյանը:

Հանդիպման մասնակցիները Դավիթ Օհանյանից հետաքրքրվել են, թե շինարարության ընթացքում Վերնիսաժը փակվելո°ւ է, թե° ոչ եւ արդյո°ք արդիականացված տարածքում կապահովվեն բոլորի համար վաճառատեղեր:

Ի պատասխան՝ քաղաքապետի տեղակալն հավաստիացրել է, որ շինարարական աշխատանքներն իրականացվելու են փուլային տարբերակով՝ տեղում առեւտրային գործունեություն իրականացնողներին հնարավորություն ընձեռելով չընդհատել եւ շարունակել իրենց աշխատանքը:

Այս ծրագրով փոփոխության կենթարկվի նաեւ տեղում իրականացվող առեւտուրը. «Բարեկարգման եւ արդիականացման ծրագրից հետո Վերնիսաժում կներկայացվի միայն անվանը համապատասխան ապրանքատեսականի՝ գեղանկարչություն, ձեռագործ աշխատանքներ, զարդարվեստ, իսկ շինարարական նյութերի եւ հագուստեղենի համար մայրաքաղաքում գործում են առևտրի բազում այլ կետեր, որտեղ էլ կուղղորդվեն նման ապրանքների վաճառքով զբաղվող քաղաքացիները»,- նշել է Դավիթ Օհանյանը:

Ինչ վերաբերում է առաջիկայում Վերնիսաժից տեղահան լինելու ճակատագրին արժանացող առեւտրականներին, ապա շատ կասկածելի է, որ նման միտքը վերջիններիս կուրախացնի: Հաշվի առնելով, որ տարածքն արդեն երկար տարիների պատմություն ունի, այս վաճառականներն արդեն ունեն իրենց տեղը եւ հաճախորդները: Իսկ հնարավոր տեղափոխության դեպքում հավանական է, որ կզրկվեն սրանցից գոնե մեկից:

Քրիստինա Տեր-Մաթեւոսյան