ՀՀԿ ԵԿ-ի պատվիրակն Ադրբեջանի վայրագությունները ներկայացրել է DEMYC-ի սեմինարների ընթացքում

Հայաստանի Հանրապետական կուսակցության Երիտասարդական կազմակերպության Արտաքին կապերի հանձնաժողովի նախագահ Լիլիթ Բեգլարյանը, ով Եվրոպայի ժողովրդավարական երիտասարդական համայնքի (The Democrat Youth Community of Europe-DEMYC) 25-րդ համաժողովում ընտրվել է DEMYC-ի փոխնախագահ, կառույցի նախաձեռնությամբ ապրիլի 7-11-ը Մակեդոնիայի մայրաքաղաք Սկոպյեում անցկացված կազմակերպված սեմինարների թեմատիկ զեկույցներից խոսել է  ղարաբաղա-ադրբեջանական հակամարտության, ապրիլյան պատերազմական գործողությունների մասին, ներկայացրել պատմական իրողությունը, ադրբեջանական կողմի վարած անխոհեմ ու անհանդուրժողական քաղաքականության հետևանքները և նրանց կողմից իրականացված անհերքելի վայրագությունները: Ներկայացվածը քննարկվել և հետագայում ևս կքննարկվի DEMYC-ի առաջիկա հավաքների և ծրագրերի ընթացքում: Այս մասին տեղեկացրին ՀՀԿ ԵԿ-ից` նշելով. «Ապրիլի 7-11-ը Մակեդոնիայի մայրաքաղաք Սկոպյեում անցկացվեցին Եվրոպայի ժողովրդավարական երիտասարդական համայնքի (The Democrat Youth Community of Europe-DEMYC) նախաձեռնությամբ կազմակերպված սեմինարները: Ծրագրի թեման էր «Թվային Եվրոպան»: Նախաձեռնությանն ակտիվ մասնակցություն ցուցաբերեց Հայաստանի Հանրապետական կուսակցության Երիտասարդական կազմակերպությունը:

Ծրագրի նպատակն էր վեր հանել այն խնդիրներն ու մարտահրավերները, որոնց հետ առաջիկա տարիներին առնչվելու են անդամ քաղաքական ուժերը իրենց գործունեության ընթացքում, ինչպես նաև համատեղ ջանքերով փորձել մեղմացնել քաղաքական գործընթացներում ավագ և երիտասարդ սերունդների միջև եղած խզումները, լուծումներ տալ երիտասարդության շրջանում աճող գործազրկության հիմնախնդրին թվային օրակարգի շրջանակներում:

Սեմինարների ընթացքում քննարկումներ եղան ժամանակակից Եվրոպայի քաղաքական մշակույթի, հետճգնաժամային աշխարհում կայունության հաստատման և միգրացիոն ճգնաժամերի վերաբերյալ:

Թեմատիկ զեկույցներից հետո ՀՀԿ ԵԿ Արտաքին կապերի հանձնաժողովի նախագահ Լիլիթ Բեգլարյանը, ով DEMYC-ի 25-րդ համաժողովում ընտրվել է DEMYC-ի փոխնախագահ, խոսեց  Ղարաբաղա-ադրբեջանական կոնֆլիկտի, ապրիլյան պատերազմական գործողությունների մասին, ներկայացրեց պատմական իրողությունը, ադրբեջանական կողմի վարած անխոհեմ ու անհանդուրժողական քաղաքականության հետևանքները և նրանց կողմից իրականացված անհերքելի վայրագությունները: Ներկայացվածը քննարկվեց և հետագայում ևս կքննարկվի DEMYC-ի առաջիկա հավաքների և ծրագրերի ընթացքում»: